د پوهاندخيرمحمدماموند او پښتو ژبي د څېړونکي محمدمعصوم هوتک په وياړ غونډه نن د سويډن د مالمو په ښار کي د افغانانو د علمي او کلتوري مرکز لخوا جوړه سوه . د افغانانو د علمي او فرهنګي مرکز مشر حبيب الله غمخور په وينا په دې غونډه کي د سويډن او ډنمارک په ګډون د يو شمېر نورو اروپايي هيوادونو څخه تر ۱۵۰ زياتو مينه والو ګډون کړئ و .
ښاغلي غمخور د لراوبر سره په ټيلفوني اړيکه کي وويل چي غونډه دقرانکريم د ايتونو په تلاوت او ملي سرود په اورېدلو د ماپښين پر دوو ( ۱۴:۰۰ ) بجو پيل او دماخستن پر نهه (۲۱:۰۰) بجو پوري يې دوام وکړ .
د غونډي لومړۍ برخه د ښاغلي خيرمحمدماموند او دوهمه برخه د پښتو ژبي څېړونکي ښاغلي محمدمعصوم هوتک کار او زيار ته ځانګړې سوې وه ، د ښاغلي غمخور لخوا د پرانستونکي وينا وروسته په بېلابېلو هيوادونو کي د علمي او کلتوري مرکزونو او اشخاصو رالېږل سوي پيغامونه ولوستل سول او يو د غونډي ددواړو مېلمنو په اړه په غونډه کي حاضرو برخه والو هم خپلي ويناوي او مقالې واورولې. د ډوډۍ خوړلو تر تفرېح وروسته د ښاغلي هوتک او عبدالوهاب سرتېر په ګډون ټولو شاعرانو په مشاعره کي برخه واخيسته .
ښاغلي غمخور لراوبرته وويل چي د غونډي برخه والو ددواړو مېلمنو درناوئ او قدر وکړ مګر ښاغلي معصوم هوتک ته د بلني پر مهال د غونډي ټول برخه وال د هغه په درناوي پر خپلو ځايونو ودرېدل .
پوهاند خيرمحمدماموند د شوروي اتحاد د خارکوف په دولتي پوهنتون کې ۱۳۵۱ کال د ماسترۍ دیپلوم اخستی اوبیایې پر۱۳۵۴ کال د ډاکترۍ PhD دتېزس څخه دفاع کړې اود همدغه کال د میزان په میاشت کې خپل هیواد ته راستون او بیر ته د کابل پولیتخنیک انستیتوت د کیمیا په دیپارتمنت کې استاد په توگه وظيفه اجراکړېده. د خلق دموکراتيک ګوند غړی ؤ خو وايي چي وروسته يې اړيکي ورسره پرې کړې.
۱۳ بېلابېل اثار يې چاپ سوي او ۳ نور يې چاپ ته چمتو دي ، نوموړی دا مهال په هالنډ کي مېشت دی .
ښاغلی محمد معصوم هوتک په ۱۳۲۶ لمريز کال په کندهار کي زېږېدلی دی ، په ١٣٦٦ ش کال دکابل پوهنتون دژبواوادبياتوپوهنځي له پښتوڅانګي څخه فارغ او دپوهنتون د علمي شورا دفيصلې له مخي په علمي کدرکي شامل اودادبياتوپوهنځي ته داستاد په توګه معرفي سو.
په ١٣٦٨ ش کال له هيواده مهاجراوله ۱۳۷۱ش کال راهيسي په کاناډا کي مېشت دی . ښاغلي معصوم هوتک په ګڼ شمېر علمي کنفرانسونو اوسمينارونوکښي برخه اخيستې اوپه يوشمير هغو غونډوکيچې دده په وياړ جوړي سوي دغونډودکوربه اونور وعلمي اوفرهنگي ټولنولخوا ستايل سوی دی .
۳۳ بېلابېل آثار يې ليکلي چي ۱۵ يې چاپ ته چمتو دي .
د نننۍ غونډي دجريان جزيات به په تفصيلي راپور کي درته وړاندي سي.
