|
خبرونه وايي په دغو مذاكراتو كي پاكستان ته د طالبانو پخوانى سفير ملا عبدالسلام ضعيف او د سعودي د استخباراتو رئيس شهزاده مقرن بن عبدالعزيز مهمه ونډه لري.
شهزاده مقرن د تېري مياشتي په منځ كي كابل او اسلام آباد ته سفر وكړ او د افغان حكومت له چارواكو سره يې د سولي د خبرو پر څرنګوالي خبري كړي دي.
همدا راز نوموړي د پاكستان له هغو سياسي مشرانو (مولانا فضل الرحمان او قاضي حسين احمد) سره چي له طالبانو سره ښې اړيكي لري، ليدلي او د سولي په باب ورسره ږغېدلئ دئ.
د افغان حكومت او طالب وسله والو ترمنځ د مذاكراتو لومړۍ غونډه د سپټمبر په مياشت كي د سعودي پاچا په يوه مېلمستيا كي وسوه، چي ويل كېږي پر افغان چارواكو سربېره د طالبانو او اسلامي حزب ځينو غړو ګډون پكښي كړى وو.
جنګ اخبار د يوه طالب چارواكي له قوله وايي چي د دوى په استازيتوب د ملامحمدعمر اخند مرستيال سيد طيب آغا، د بهرنيو چارو مرستيال وزير ملاجليل او ملا مستعصم اخند په دې خبرو كي ګډون كړى وو، او د افغان حكومت استازيتوب د ولسمشر حامد كرزي ورور قيوم كرزى كوي.
كه څه هم طالبان له افغان چارواكو سره د هر راز خبرو اترو جريان ردوي، خو دا څووم ځل دئ چي دغسي خبرونه بېله جزياتو خپرېږي.
|
