د هرات ښاريان كه له يوې خوا د دغه ولايت په اداري ټيم كي له وروستيو بدلونونو خوښ دي له بلي خوا ولايت ته د اسدالله خالد پر نومونه باندي اندېښمن دي.
له هرات څخه وركړل سوي خبرونه وايي چي هرات ښاريانو د ښاغلي خالد له نوموني سره مخالفت ښودلى او هغه يې په غزني او كندهار ولايتونو كي د كار پر مهال ناكامه بللى دئ.
ولسمشر حامد كرزي تېره اونۍ وروسته له هغه د هرات په امنيتي او ملكي اداره كي يو لړ بدلونونه اعلان كړل، چي ښاريانو په هرات كي له تښتوونو او ترورونو څخه د خلاصون په خاطر پرله پس مظاهرې وكړې او هرات وكيلانو له ولسي جرګې څخه بايكاټ وكړ.
هراتيانو د امنيه قومندان په توګه د مل پاسوال عصمت الله عليزي له ټاكل كېدو هركلى كړى او د ولايت دپاره يې د اسدالله خالد نوم رد كړئ دئ.
عصمت الله عليزي چي مخكي په كندهار او پكتيا كي د امنيه قومندان په توګه دندي ترسره كړي په خپلو چارو كي فعال، نه ستړى كېدونكى او يو جدي قومندان ګڼل كېږي، خو اسدالله خالد چي د غزني او كندهار په ولايتونو كي يې دندي اجرا كړي كورنيو او بهرنيو چارواكو په اداري فساد ككړ او په كارونو كي ناكام بللى دئ.
د يادوني وړ ده چي د اسدالله خالد نوم يوه مياشت دمخه د پارلماني چارو د وزير په توګه هم د افغانستان ولسي جرګې ته وړاندي سوى و.