لراوبر ویب پاڼه لراوبر يو افغان – تازه خبرونه
د شينهوا خبري آژانس خبر ورکړ چي پرتاب مکرجي د هند د بهرنيو چارو وزير نن يکشنبه وويل چي که پاکستان ډير ژر د هغو کسانو پر ضد چي د بمبئي په تروريستي حملو کي د هند لخوا معرفي سوي دي لازم اقدام ونکړي، نو لا ډير نور څه هم کېدلای سي .
د هند د بهرنيو چارو وزير د هند د حاکم کمونيسټ ګوند په غونډه کي وويل چي: هيڅوک بايد داسي فکر ونکړي چي دغه ستر هيواد د شرايطو سره د مخامخ کېدو په هکله نا توانه دی . موږ په تکرار سره وايو چي اوس هم زموږ د انتخاب و مخي ته ټولي لاري خلاصي دي .
آژانس وايي چي د هند د بهرنيو چارو وزير زياته کړېده چي د پاکستان دولت بايد پر خپل لوز باندي چي په خپله خاوره کي د فعاله ټروريسټانو پرضد به اقدام کوي، ولاړ وي .
موکرجي زياته کړه : داسي بايد و نسي چي د نړۍ والي ټولني توجه بې لاري کړل سي . لاس په کار شی او هغه کسان چي دتروريستي کړو تر شا پټ دي و محکمې ته را کش کړی . خو نوموړي دې خبري ته هم وضاحت ورکړ چي د تروریزم سره جګړه د هيڅ دين پرضد نده داځکه چي هيڅ يو دين هم د تروریزم سره تړاو نلري او سرحدونه نه پېژني .
دتير نوامبر په مياشت کي ټروریستي حملو په بمبئي کي ۱۷۳ تنه ووژل . ډهلي په دې باور دی چي د لشکر طيبه په نامه يوې نيمايي پوځي ملېشې چي په پاکستان کي مېشته ده ددغو حملو تر شا ولاړ وو.
