ناټو د افغانستان په مرداب کښي

د دلوي ۲۶ مه نېټه  د افغانستان په تاريخ کي نه هېرېدونکې ورځ ده . زموږ د مجاهد او پر خپلواکي مين ولس  په دغه ورځ شوروي يرغلګر ځواکونه د خپلي خاوري نه و شړل او دوخت جمهور رئيس ډاکټر نجيب الله د خپلواکۍ د شهيدانو و اروحو ته د درناوی په خاطر دغه ورځ د افغانستان د نجات ورځ ونومول او هغه يې د خلکو د جشن  عمومي رخصتي  اعلان کړل .

خو د شورويانو د وتلو وروسته   افغانستان بيرته  دادی  د کهنه پيخه يرغلګرانو په ولکه کي راغلی  دی  .

په لندن کي چاپېدونکې ګارډين  ور ځپاڼه  په دې مناسبت  تازه  ليکلي دي او اټکل کوي چي امريکا به د افغانستان په  پاڼ کي د شوروي د سرنوشت سره مخامخ او ان  تر هغه  يو بدتره حالت به يې و مخي ته پروت وي  .

نوموړې ورځپاڼه په اتيايمه لسيزه کي  د شوروي  اتحاد د سره پوځ يرغل  د يوويشتمي پېړۍ په پيل کي د امريکا او انګليس د حملې سره پرتله کوي او اټکل کوي چي نوي يرغلګران به ورته سرنوشت او حتی بدتره  انجام  به   ولري .

دغه ورځپاڼه ليکي چي شل کاله مخکي په همدې ورځ ( ۱۴ فروري – ۱۹۸۰ ) شورويانو پرېکړه وکړه د افغانستان نه خپلي پښې لنډي کړي ، خو امريکا او ناټو تصميم و نياوه چي دغه جګړه اوږده و ساتي .

 په دې لړ کي بارک اوباما  خو لا پلانونه لري چي ۳۰ زره نور اضافي پوځونه افغانستان ته وليږي  او بلي خوا د ناټو غړي هيوادونه هم په نظر کي لري خپل ځواکونه دلته  زيات کړي . ددې زياتوالي سره به د بهرنيوهيوادو د پوځونو شمېر به و يولکو پنځلس زره تنو ته ورسيږي . دغه شمېر درست د شورويانو د هغه  پوځو د شمېر سره برابر دی  چي د ۱۹۸۰ په لسيزه کي په افغانستان کي مېشته وه  خو ددې سره سره يې بياهم و نکړای سو ځان و بري ته و رسوي .

که څوک د شوروي ځواکو د حالت سره  و ضعه  مقايسه کړي، نو امريکا او ناټو د همدې اوسه څخه په ډيرو سختو شرايطو کي شپي سبا کوي .  داځکه په هغه وخت کي طالبان نه وه ، د افغانستان عمده ولايتونه  د مرکز په کنټرول کي وه . ځانوژونکي  حملې نه وې ، افغان پوځ او پوليس په يوه مؤثره حالت کي  وو او کابل هم د شورويانو تر حکمرانۍ لاندي آرامه وو . مجاهدينو به پر ښار باندي  خال خال او نوبتي راکټونه اورول خو لږ شاني خرابي به يې پرېښودلې ، داسي چي د ژوند نورمال حالت يې نه سره شلاوه .

که د ناټو سرغنه داسي فکر کوي چي دعراق نه ماسېوا، د افغانستان جګړه  يوه سمه جګړه ده نو واقعاً  په  دام کي لوېدلی دی . د اوباما طرحه به ښايي په يوه لنډمهاله وخت کي فايده منه وي خو په اوږدمهاله موده کي به وافغانستان ته هيڅ  هم را نه وړي ، دا خبره لا پر خپل ځای پاته ده چي  امريکا او انګليس    به بې  درکه روپۍ مصرف خو ټوله به  د خاورو خاکه  سي .