بشرمل شان لوبډله د فلمي ستورو ترمنځ د کرکټ سياليو پاى لوبې ته ووته.
په ننګرهار کې د لسو فلمي ستورو او د خپلواکو ژورنالستانو يوې لوبډلې په ګډون د سولې په نوم د کرکټ سيالۍ شاوخوا دوه اونۍ وړاندې د جلال اباد ښار سراج العمارت بڼ کرکټ لوبغالي کې پيل شوي دي.
ددغو سياليو په نيمه پاى لوبه کې بشرمل شان لوبډلې خپلواکو ژورنالستانو لوبډلې ته ماتې ورکړه او پاى لوبې ته يې لاره پيداکړه.
په ترسره شوې سيالۍ کې لومړى توپ وهنه خپلواکو ژورنالستانو لوبډلې وکړه او سيالې لوبډلې ته يې د يوسلو اوه منډو هدف په دولسو اورونو کې د پنځو لوبغاړو په سوځېدو کېښوده.
دغه هدف بشرمل شان لوبډلې د څلورو لوبغاړو په سوځېدو په لسو اورو کې پوره کړ.
د لومړى نيمه پاى لوبې غوره لوبغاړى هدايت ونومول شو چې د خپلواکو ژورنالستانو لوبډلې څلور لوبغاړي يې سوځولي و.
دوېمه نيمه پاى لوبه کې نجيب صادق او معشوق شاداب لوبډلې سره مخ دي، هرې لوبډلې که سيالي وګټله د بشرمل شان لوبډلې سره به په پاى لوبه کې د اتلولۍ مقام ترلاسه کولو په موخه د سې شنبې په ورځ مخامخ شي.