طالبانو په خپله ويب پاڼه کي خبر ورکړ چي تېره شپه يې د پروان ولايت په کوه صافي کي د خروټو د کلي په ورسک سيمه کي يوه دوه څرخه الوتکه په راکټ ويشتلې او رانسکوره کړې يې ده . طالبان ليکي چي ياده سيمه د بګرام د هوايي ډګر څخه په دوه کيلومترۍ کي پرته ده .
د طالبانو په وينا چي د الوتکي د رالوېدو له کبله ټول سپاره سپرلي وژل سوي خو دوى يې په اړه کره معلومات نه لري .
ناټو په دې اړه لراوبر ته يوه خبرپاڼه هم رالېږلې وه او په هغې کي يې د افغانستان په ختيځ کي د خپلي يوې الوتکي د رالوېدو پخلى کړى و او زياته کړې يې وه چي د الوتکي د رالوېدو له کبله يو فوځي هم وژل سوى دئ .
د يادوني وړ ده چي لراوبر ته د ناټو له لوري دا خبر نن سهار وختي را رسېدلى و او د يادي پېښيه په اړه ويل سوي وه چي تېره شپه يې الوتکه رالوېدلې او لراوبر يې په اړه ليکلي وه چي په دې اړه تر اوسه وسله والو طالبانو څه نه دي ويلي خو نن يې طالبانو هم پخلى وکړ .