پر محمديار د بريد په اړه د پلټنو پايلي ناڅرګنده پاته دي

د لراوبر اداره | جون 6th, 2009

پر محمديار بريد پر کلتور او ژورناليزم بريد دئ ( لراوبر)

لراوبر – کابل

د کورنيو چارو وزارت لخوا هغه پلاوی چي د دولتي چارواکو په امر د محمديار د وهلو د قضيې د پلټلو په نيت کندهار ته تللی و ، تر اوسه چوپه خوله پاته دی ، د کندهار داطلاعاتو او کلتور ريس مجيد بابی د پلاوي د راتګ څخه ځان بېخبره ښيي ، محمديار ته نژدې کس لراوبر ته وويل چي د پېښي د پلټني په اړه په کندهار کي درې کسيز پلاوی ټاکل سوی دی ، د يادوني وړ ده چي په په دې پلاوي د اطلاعاتو او کلتور ريس مجيد بابی هم برخه لري ، پر ښاغلي مجيد بابي تور دی چي د مشاعرې په تالار کي يې د محمديار په لاس کي پاڼي ترې اخستې او څېرلي دي ، د مشاعرې ګډون کوونکو لراوبر ته وويل چي دمشاعري د ورځي له سهاره ښکارېده چي چارواکو د محمديار سره دداسي يوه چلند په اړه پلان جوړ کړی و .

——

— ———

د پيښي په اړه د ازادۍ راډيو راپور :

د پيښي په اړه د بي بي سي راپور :

د پيښي په اړه د ډاکټر اشرف غني احمدزي د خبري کنفرانس جزيات :

محمديار د کندهار والي په امر وهل ټکول سوئ دئ

دا د کابل د واکمن کار دئ چي د کندهار له واکمن احمد ولي کرزي او دهغه له سيکرټر توريالي ويسا څخه د محمديار پر وړاندي ددې غير اسلامي او غير انساني عمل پوښتنه وکړي او عاملين يې د امرينو په ګډون د محکمې مېز ته راکش کړي . کنه نو ددې عمل امر د کابل د واکمن لخوا د هغه د اطلاعاتو او کلتور وزير او کورنيو چارو وزير په موافقه اجرا سوئ دئ . ځکه چي نه يوازي دا هر څه د لوړ رتبه دولتي چارواکو،اطلاعاتو او کلتور ريس او پوليسو تر سترګو لاندي ترسره سوي دي بلکي نوموړو چارواکو د محمديار په وهلو ټکولو کي يو له بله مرسته کړېده .

عبدالله احسان
د لراوبر افغانستان ويبپاڼي مسول

۲۱ می ۲۰۰۹ کندهار

دبېنوافرهنګي ټولني مشر او د افغانستان سهېل لويديځ زون لپاره د سهيلي اسيا د ژورناليستانو ټولني سفما منشي عبدالاحمد محمديار نن په داسي حال کي د وسله والو کسانو لخوا د انارګل مشاعرې له جريان څخه په زور ايستلو ته مجبور سو چي په سلګونو نورو شاعرانو او ليکوالو په دې دوديزه مشاعره کي برخه اخستې وه .

عبدالاحمد محمديار لراوبر ته وويل چي وسله والو کسانو ورته ويلي چي د کندهار والي ډاکټر توريالي ويسا يې د انارګل مشاعرې څخه د ايستلو او ډبولو امر کړی دی او له غونډي ځکه بايد ووزي چي بې بلني دې غونډي ته راغلی دی ، محمديار وايي چي دغو کسانو ته مي هغه بلنليک ښکاره کړ چي ماته په دې غونډه کي د بلني لپاره لېږل سوی و ، خو بيا هم نوموړو کسانو زه په زور له تالاره ايستلو ته اړ کړم .

محمديار وايي چي له خپلو څو تنو ملګرو سره د مشاعرې له تالاره تر وتلو وروسته د ملي امنيت څو کسانو په داسي حال کي ور حمله کړه چي ملي پوليس هم حاضر وه ، نوموړی وايي چي له دغو کسانو سره وسلې هم ورسره وې او دده نورو ملګرو ته يې چي غوښتل يې دی د وسله والو له منګولو خلاص کړي په ورسره توپنګچو ګواښ وکړ .

ليکوال او شاعر او په دواړو پښو او سترګو معيوب محمديار د وسله والو لخوا د سوکونو او لغتو برسېره په خپلو لکړو داسي وهل سوی چي لکړي ورباندي ماتي کړي دي .

د ميرويس روغتون يوه جراحي ډاکټر د نوم نه ښودلو په شرط لراوبر ته وويل چي محمديار پر سر ، مخ ،لاسونو ، ملا او معيوبو پښو ژوبل سوی دی .

په نننۍ انارګل مشاعره کي ځينو ګډون کوونکو د نوم پټ ساتلو په شرط لراوبر ته وويل چي د محمديار پر وړاندي دې پېښه کي د کندهار د اطلاعاتو او کلتور ريس عبدالمجيد بابی ، کندهار ښاروال او د کندهار والي ډاکټر توريالی ويسالا لاس درلود، د يو شمېر نورو فرهنګيانو په نظر د محمديار پېښه په مخامخ توګه د کرزيانو د واکمني کورنۍ سره اړه لري ځکه چي هغوی سر له اوسه غواړي په ټاکنو کي د خپل سيال ډاکټر اشرف غني احمدزي ملاتړي وډاروي ، ډاکټر اشرف غني احمدزی د ټول هيواد په کچه له فرهنګي او کلتوري کړيو له ملاتړ څخه برخمن دی ، او دا هغه څه دي چي ښايي د اوسني ولسمشر حامد کرزي پر واک د پاته کېدو خيالونه په اوبو لاهو کړي .

عبدالاحمد محمديار

–

No government has ever paid attention to Zhob »

« شاهکار ادبي بهير