په عربي هېوادونو کې مېشتو افغانانو ته خبر ورکول کېږي چې له نیکه مرغه دا ځل پښتو نړیوال کنفرانس د افغان کلتوري ټولنو د جرګې له خوا په کابل کې د ۲۰۰۹ کال د اکتوبر په ۸ او ۹ مه ( د ۱۳۸۸ د تلې په ۱۶ او ۱۷ مه ) جوړېږي، چې په پېښور اوکوټه کې د پښتو نړیوالو کنفرانسونو د لړۍ یوه بله کړۍ ده.

 د کنفرانس ترتیبونکو هوډ کړی دی چې په دې کنفرانس کې د نړۍ له ټولو پښتنو څخه پوهان، څېړونکي او د نظر خاوندان ګډون وکړي. کنفرانس د عربي نړۍ د اړيکو لپاره په دوبۍ کې مېشت (هلال مومند) ګمارلی دی تر څو په عربي نړۍ کې د مېشتو پښتنو سره اړيکي ونيسي او کنفرانس ته د دې سيمو د پښتنو په استازيتوب پوهان، څېړونکي او د نظر خاوندان ولېږي.

 په بېلابېلو هېوادونو کې له ټولو افغاني ټولنو، پوهانو، څېړونکو او د نظر له خاوندانو هيله کېږي د هلال مومند سره د سپتمبر له لسمې مخکې اړيکي ونيسي تر څو نوموړي کنفرانس ته د تابیا لپاره غونډه جوړه او پکې په عربي هېوادونو کې د مېشتو پښتنو په استازيتوب پوهان، څېړونکي او د نظر خاوندان غوره کړل شي.

 اړيکې:

 ۱. د هلال مومند ټيلي فون +۹۷۱۵۰۴۵۷۴۱۳۶ ، یا +۹۷۱۵۰۹۲۷۹۸۷۰ برېښنا ليک: imomand@yahoo.com

 د پښتو نړيوال کنفرانس په اړه:

پښتو نړيوال کنفرانس

 په پېښور اوکوټه کې تېرو پښتو نړیوالو کنفرانسونو د پښتو د ودې اوپرمختګ او پښتنو دروښانتیا په برخه کې دپام وړ ونډه درلودلې ده. دا ځل به د پښتو نړیوال کنفرانس په بیله بڼه د پښتنو پر بنسټیزو ستونزو غور وکړي او دا به وڅېړي چې ولې نن سبا پښتانه له دومره ډېرو ناخوالو او ربړو سره مخامخ دي.

 کومې ستونزې :

 په دې کنفرانس کې به د ستونزو پرلاندینیو کلتوري او ټولنیزو اړخونو بحث وشي:

 ۱ـ د پوهنې ( ښوونې – روزنې) کمزورتيا.
۲ـ کلتوري – دوديزې ستونزې.
۳ـ د پښتو ژبې د ودې او پرمختيا پر وړاندې پرتی ستونزې او خنډونه.
۴ـ د ټولو پښتنو د ويښتيا – روښانتيا او پرمختيا لپاره نړيوال جال او بدنه.

 پښتو نړيوال کنفرانس به د هرې موضوع لپاره یوه کاري ډله ( ورکشاپ) جوړوي. په دې ورکشاپونو کې به :

 لومړی: د ستونزې عوامل څېړل کېږي
دویم : د حل لارې به یې پلټل کېږي
درېیم : دحل لارو د عملي کولو لپاره به میکانیزمونه، مهالویشونه او لارې چارې را منځ ته کېږي.