لراوبر ویب پاڼه لراوبر يو افغان – تازه خبرونه
د ١٩ کلنو ځوانانو د کرکيټ ملي لوبډلي د کرکيټ په نړيوالو سياليو کي هانکانګ ته ماتې ورکړه.
دا د کرکيټ په نړيوالو سياليو کي د افغانستان دريمه لوبه وه چي په نيوزلنډ کي يې ترسره کړه. د لوبي په پيل کي پچه افغان لوبډلي ګټلې او بيټنګ ته يې هانکانګ درولئ چي د هانکانګ ټوله لوبډله يې د ١٣٧ منډو په ترسره کولو په ٣٥ آورنو کي وسوځله.
افغان لوبډلي د هانکانګ له خوا ورکړل سوئ هدف په ٣١ آور کي ١٤١ منډي وکړې او لوبه يې په اتو ويکټونو وګټله.
دا د افغانستان په تاريخ کي لومړى ځل دئ چي افغان لوبغاړي نړيوالو سياليو ته لاره مومي او د کرکيټ لومړنۍ نړيواله لوبه ده چي افغانستان يې ګټي.
افغانستان تر دې دمخه په همدغو سياليو کي له هندوستان او انګلستان څخه ماتې خوړلې وه، چي د څارونکو په وينا له يوې خوا افغان ځوانان بې تجربې ول او له بلي خوا يې د لوبډلي پنځه مهم لوبغاړي په کاناډا کي پټ سوي وو، چي د افغان لوبډلي پر لوبه يې ژور تاثير کړئ وو.
د لراوبر ويبپاڼي اداره ټولو افغانانو او په ځانګړې توګه افغان زلميانو ته د دې برياليتوب مبارکي وايي او په آينده کي د نورو برياليتوبونو دعا ورته کوي.
