په كابل كي ځان وژونكي حملې 6 بهرني سرتيري وژلي
افغان امنيتي چارواكي وايي، چي په كابل ښار كي د نن سهار ځان وژونكې حملې عامه خلكو او نړيوالو ځواكونو ته مرګ ژوبله اړولې ده.
د كورنيو چارو د وزارت وياند زمري بشري ازادۍ راډيو ته ويلي، چي په دې حمله كي، لږ ترلږه دولس ملكي وګړي وژل سوي او اووه څلويښت نور ټپيان دي.
د نوموړي په وينا په وژل سوو او ټپيانو كي ښځي او كوچنيان هم شامل دي.
نړيوالو ځواكونو په يوه اعلاميه كي ويلي چي، په دغه حمله كي د دوى 6 سرتيري وژل سوي او څو نور يې ژوبل سوي دي.
ولسمشركرزي دغه ځان وژونكې حمله په كلكه غندلې.
ددغي ځان وژونكي حملې مسئوليت وسلوالو طالبانو منلى دى.