د جولای پر لسمه د افغانستان د کرکيټ ملي لوبډلي په هالنډ کي د کوربه هيواد سره سيالي دافغانستان په ګټه پای ته ورسوله ، په دې سره افغانستان د ۲۰۱۰ د ډيويژن يو په سياليو کي دريم مقام وګاټه ، که افغانستان د ۹ جولای لوبه له سکاټلنډڅخه ګټلې وای نو به د آيرلنډ سره پايلوبي ته وتلای . د کرکيټ ملي لوبډله نن د جولای ۱۱ بيرته افغانستان ته ستنه سوه .

ملي لوبډلي ۹ جولای د سکاټلنډ سره لوبه درلودل چي سکاټلنډ په دوو ويکټونو سره بازي و ګټل او پدې سره افغان لوبډلي پاينل سيالۍ ته لار و نه موندله .

بل لور ته نن ايرلنډ او سکاټلنډ پاينل سيالۍ ته سره وتلي دي چي هغه هم د هالنډ په امتلفېن ښار کښي ترسره کيږي.

---

سکاټلنډ په دوو ويکټونو وګټله .

---

د افغانستان بله لوبه  ۹ جولای د جمعې ورځ د سهار پر ۱۱ بجې د سکاټلنډ سره  د هالنډ په دوهم لوی ښار روتردام کي کېدونکې ده .

د ملي لوبډلې سږنيو لوبو ته د تېر کال په پرتله د تماشاتيانو شمېر کم دی ، اکثريت هالنډ ميشتي افغانان اوس هم د کرکټ له دې سياليو څخه خبر نه دي ، هالنډ ميشتی افغان همايون هم وايي چي يوازي دوې ورځي مخکي يې له يو ملګري واوريدل چي د کرکيټ ملي لوبډله هالنډ ته راغلې ده ، دی اوس دپاته دوو سياليو د ځای ځاګي پوښتنه کوي .

هالنډ مېشتی افغان ښاغلی اجمل ننګ وايي چي افغاني رسنيو ته لازمه وه چي د سياليو تر پيل کېدو مخکي يې اعلانونه کړي وای چي اروپا مېشتي افغانان له دې سياليو پر وخت خبر سوي وای او د سياليو په ورځو له خپلو کارونو رخصت اخستی وای .

د ملي لوبډلي کفتان نوروزخان منګل  او د  ولسمشر حامد کرزي سلا کار وزير شهزاده مسود بيا د سياليو پر مهال د افغانانو له شمېره شکايت نه کوي ، شهزاده مسعود تېره شپه د ملي لوبدلي لپاره د افغانانو لخوا په جوړه سوې غونډه کي د هالنډ ، کېنيا او کاناډا څخه د لوبو په ګټلو کي د افغانانو ملاتړ او تشويق د پام او ستايلو وړ وباله .

هغوی چي د افغانستان د لوبو پر وخت د کرکيټ ميدان ته راغلي وو  زياتره يې په دې نظر وه چي که افغاني رسنيو په دې اړه له مخکي خبرتياوي خپرې کړي وای ، د افغانانو شمېر به تر دې لس ځله زيات وو .

جمعه ۹ جولای ۱۱:۰۰  افغانستان – سکاټلنډ – د لوبغالي پته:    Hazelaarweg5,  Rotterdam

---

د تېرو لوبو حال :

۷ جولای : افغانستان له هالنډ څخه په ۶ ويکټه لوبه وګټله :

د هالنډ لخوا افغانستان ته د ۲۰۲ منډو ټاکل سوی هدف افغانستان په اساني سره پوره کړ او دا سيالي يې هم وګټله ، په لوبغاړي کي چي نن د نورو ورځو په پرتله زیاتو کسانو ګډون کړی وچي د کرکټ بريا يې په تودو اتڼونو او خوښيو ولمانځله .

---

افغانستان -کينيا دريمه سيالي :

د لوبډلي منېجر ښاغلی عبدالرحيمزي لراوبر ته د نن لوبي په اړه وويل چي لوبه د پرونۍ په پرتله ښه روانه ده ، کوم هدف چي موږ ته ټاکل سوی دی که سمه لوبه وشي نو زموږ د لوبډلې اووه تر اتو کسانو پوري کولای سي دا هدف ترلاسه کړي . نوموړی وايي تېره شپه يې په خپلو منځونو کي د لوبډلي د لا يووالي لپاره غونډه کړې وه چي د نن په لوبه کي يې اغېز څرګند شو .

نوموړي د ميدان په اړه وويل چي د بېټسمينانو لپاره مناسب دی ، دا هم زموږ سره د نننۍ سيالۍ په ګټلو کي مرسته کولای سي .

---

افغانستان – آيرلنډ دوهمه سيالي :

ایرلنډ پرون ورځ افغانستان ته ۲۳۸ منډې هدف وټاکه، خو د باران له امله لوبه نن ورځې ته وځنډیده نن ورځ په سیمه ییز وخت یولس بجې لوبه د هالنډ په روتردام کې پیل شوه چې تر اوسه روانه ده خو داسې ښکاري چې نن افغانان د نورکله په پرتله تیزه لوبه نه کوي د ملي لوبډلې منیجر وايي چې لوبه زموږ په زیان روانه ده.

په دې سره د حميد حسن پرونۍ اندېښنې پر ځای وختې چي ويل يې دا به زموږ په ګټه وای که په لوبه کي وقفه نه وای راغلې ، خو دلوبډلي روزونکی بيا په بل نظر وو ،  ښايي حاجي کبيرخان به د خپلو لوبغاړو د مورال ساتلو په موخه پرونی باران د افغانستان په زيان نه باله .

ورستی حال لوبه په سیمه ییز وخت دوه بجې د افغانستان د ملي لوبډلې په ماتې پای ته ورسیده د سبا ورځې لوبه دوشنبې ۵ جولای د افغانستان او کېنيا تر منځ په امستلفېن کي پيليږي .

پته يي داده :  Nieuwe Kalfjeslaan 21 B, Amstelveen

---

افغانستان – آيرلنډ لومړۍ ورځ :

افغانستان ته ايرلنډ ۲۳۸ منډي هدف وټاکی ، د افغانستان د بايټنګ شروع کيدو پر مهال هوا خرابه سوه ، لوبه د هالنډ په وخت د ماځيګر تر شپږو بجو وځنډيده او وروسته يی سبا ته د ځنډيدو اعلان وسو . که څه هم لوبغاړو غوښتل چي دغه نن د آيرلنډ طبعيت ور برابر کړي ، خو حاجي کبيرخان وايي چي دا په اصل کي زموږ په ګټه ده چي سبا د ورځي له سره بيټګ وکړو او ټاکل سوي هدف ته ځان ورسوو ، کبيرخان خپه نه ښکاري ، دليل يی داید چي سبا ته به هوا هم د نن په پرتله توده وي او زموږ لوبغاړي به هم تازه دمي ميدان ته راسي .

 

۳ جولای ( افغانستان – آيرلنډ )

د لومړي ډيويژن په سياليو کي نن افغانستان له آيرلنډ سره سيالي کوي ، لوبه څو شيبې مخکي د هالنډ د روتردام په ښار کي پيل سوه ، پچه آيرلنډ وګټله او لومړۍ بېټنګ  يې پيل کړ . زموږ د لوبغاړو مورال قوي دي ، نوروز منګل د لراوبر سره په خبرو کي له ټول ولس څخه ددعا غوښتنه وکړه چي افغانستان په دې سياليو کي اتل راووزي . موږ هم دعا ورته کوو چي څښتن تعالی دي زموږ شازلمو ته ډير توان ورکړي چي په دې او راتلونکو سياليوکي د خپل هيواد نوم او نښان هسک وساتي ( امين)

---

نن د جولای د مياشتي لومړۍ نېټه په هالنډ کي د کرکيټ لومړي ډيويژن سيالۍ پيل کيږي ، افغانستان هم په لومړي ځل د لومړي ډيويژن په سياليو کي برخه اخلي . ددې نړيوالو يو ورځنيو سياليو په لومړۍ ورځ افغانستان له کاناډا څخه د ۲۵۹ منډو په جوړولو ددی سياليو لومړۍ لوبه وګټله .

لراوبر ويبپاڼه له دې امله ټولو لوستونکو ته مبارکي وايي ، په لاندي ويډيو کي په لنډ ډول د ملي لوبډلي د روزونکي حاجي کبيرخان او کپټان نوروزخان منګل د لراوبر سره په مرکه کي وينئ :

ملي لوبډله د جون د مياشتي پر ۲۷ هالنډ ته ورسيده ، ددې لوبډلي روزونکي حاجي کبيرخان  لراوبر ته د ټيلفون پر ليکه په هالنډ کي د افغانستان د کرکيټ ملي لوبډلي د لوبو د پلان لنډيز په دې ډول وړاندي کړ ، لراوبر ويبپاڼه د اروپا مېشتو افغانانو د اسانتيا لپاره د هري لوبي وخت او پته لوبغالو ته دهغوی د راتګ په هيله وړاندي کوي .

پنجشنبې ۱ جولای۰۹:۰۰ –  ۱۴:۳۰  افغانستان – کاناډا  – فوربورخ Van Ruysdaellaan 3G, 2264TK Leidschendam – Voorburg

شنبې ۳ جولای۰۹:۰۰ –  ۱۴:۳۰  افغانستان – ايرلنډ – روتردام  Hazelaarweg,  Rotterdam

دوشنبې ۵ جولای۰۹:۰۰ –  ۱۴:۳۰  افغانستان – کېنيا – امستلفېن  Nieuwe Kalfjeslaan 21 B, Amstelveen

چارشنبې ۷ جولای۰۹:۰۰ –  ۱۴:۳۰  افغانستان – هالنډ – فوربورخ   Van Ruysdaellaan 3G, 2264TK Leidschendam – Voorburg

جمعه ۹ جولای ۰۹:۰۰ –  ۱۴:۳۰  افغانستان – سکاټلنډ – روتردام  Hazelaarweg,  Rotterdam

شنبې ۱۰ جولای : فاينل لوبه

لراوبر ويبپاڼه هڅه کوي چي دخپلي ملي لوبډلي د لاسته راوړنو وروستي جزيات تاسو ته وړاندي کړي .

د لراوبر ويبپاڼي اداره  په هالنډ او شاوخوا هيوادونو کي له مېشتو افغانانو څخه هیله کوي چي د خپل هيواد ملي لوبډلي د ملاتړ او تشويق لپاره ددوی په سياليو کي په پراخ تعداد ګډون وکړي .

دلوبو د دقيق وخت او ادرس لپاره په هالنډ کي د ICC سيمه ايز همکار ته زنګ ووهئ : مختار بټ 0031629206447