تېره ورځ د نيمروز ولايت په چخانسور ولسوالۍ کي په دوو بېلابيلو ترافيکي پيښو کي دوو تنو خپل ژوند له لاسه ورکړ . لراوبر ته د ترافيکو د عمومي مديريت يو تن غړي ښاغلي عتيق الله د ټليفون پر کرښه وويل چي لومړۍ پېښه د يوه مازدا ډوله موټر او رخشې تر منځ شاوخوا شپږ بجې سهار مهال وسوه، چي په پايله کي يې رخشوان ژوند له لاسه ورکړ او دويمه پېښه هم په همدې ولسوالۍ کي د يوه ټېلر او کرولا موټر تر منځ د ورځي پر لس بجې سوې چي په پايله کي يې د کرولا موټر يو تن سپرلي خپل ژوند له لاسه ورکړ . ښاغلي عتيق الله وايي چي د مازدا او ټېلر چلوونکي يې نيولي او اوس د حکومت په لاس کي دي او قانوني چلند به ورسره وکړي .