((لومړنۍ مشاعره))

له تېروو دوو اوونيو راهيسې چي په فېس بوك ويبپاڼه كې د بانډارخونو (Chat rooms) د جوړېدو لړۍ پيل شوې ده، يو پكې د (كره كتنې) بانډارخونه ده چي ګران ملګري سيد شاه سقيم جوړه كړې ده، د اكتوبر پر ۲۶مه نېټه ۲۰۱۰م كال ماخوستن چي د كره كتنې دې بانډارخونې ته ور ننوتم څو تنه نور ادبي دوستان او شاعران ملګري هم پكې موجود وو، تر لږ ادبي بانډار وروسته مو پرېكړه وكړه چي يوه سملاسي مشاعره وكړو، د مشاعرې لپاره چي كوم ملګري نوى بيت جوړ نه كړ، نو د غزل د بابا اميرحمزه شينواري يو بيت مو وړاندې كړ او پر هغه مځكه مو سملاسي (فى البديهه) مشاعره پيل كړه، په دې مشاعره كې نعيم افغان د عربي اماراتو له دوبۍ، عماد دوران له پېښوره، سعيد زابلي له پښينه، حكمت سروش له هنده، عبدالله شاه ژوندون د عربي اماراتو له شارجې او ما باركوال مياخېل او زما ملګري سيدشاه سقيم له كوټې څخه پكې برخه لرله. دا دى د دې مشاعرې په څو شېبو كې تاسې هم راسره شريكوو او د دغې مشاعرې د شعرونو لوستلو ته مو را بولو: ((باركوال))

حمزه بابا:
((تا چي سبا وكړو سبا نه راځي
راشي په هر چا خو په ما نه راځي))

باركوال:
اوښكې خو له سترګو په غلا نه راځي
درد يې وي ملګرى جلا نه راځي

سقيم:
زموږ مېلمه زموږ خوښي په غم لړي
نور دي زموږ کلي ته ورا نه راځي

باركوال:

خدايه! بس له دې جنګه مو و ژغورې
بيا دي دې وطن ته بلا نه راځي

سقيم:
اوس د بې وسۍ تر ټاک ور واوښتم
يار راڅخه ځي او ژړا نه راځي

باركوال:
ځئ د مينې تخم زړو كې و كرو
وروڼو خوشالي په دوعا نه راځي

سروش:
راشه را ترغاړه شه دا مينه ده
دې کې څه ثواب او ګنا نه راځي

سعيد زابلى:
ما ته ده رایاده جدایي خپله
خوله كې مي رقیب ته ښېرا نه راځي

باركوال:
مه خانده زما وير پسې مه خانده
نه چي تل پر ما دى پر تا نه راځي

سعيد زابلى:
راشه اوس د وخت امتحان وګوره
يار مي رانه ځي خو ژړا نه راځي

باركوال:
خداى به ژر د سولې پسرلى راولي
زه وايم راځي او ته وا نه راځي

سقيم:
سل مچې ترې واخملم چې په لاس راشي
چل د سپينې خولې د سپما نه راځي

باركوال:
زړه! ګوره جانان ته چي بې زړه نه شې
څوك د مينې جنګ كې پر شا نه راځي

عماد دوران:
اوس مې د خپل زړه په چل پوی شوی يم
اوس د هغو ښکليو پروا نه راځي

باركوال:
ښكلې لږ د حسن ذكات غواړمه
بل به درته داسې ګدا نه راځي

نعيم افغان:
ګل څخه خوشبو هم خپه شوې ده
ځکه اوس بورا پر دې خوا نه راځي

باركوال:
هلئ پاڅئ مخ د توپان ونيسئ
وير خو په اتڼ په نڅا نه راځي

سروش:
خپل په لاس مې خپل زړه په درد واړاوه
اوس يې راته لار د دوا نه راځي

باركوال:
زړه چي ترېنه يوسي په يوۀ نظر
داسې بلاګۍ دي پر چا نه راځي

افغان:
ګل ما شوم و مور ته په ژړاشولو
وې ویله ولې بابا نه راځي؟

سروش:
اوس په نه خبره باندې ژاړمه
اوس په هيڅ خبره خندا نه راځي

افغانمل (چي له نعيم افغان سره بل ملګرى شاعر و):

دلته یې په کاڼو باندې ولي ټول
ځکه پر دې لوري روڼا نه راځي

باركوال :
شكر پكې جوړه كراري شوله
اوس له پورې كلي درزا نه راځي

ژوندون:
مورې نن مي ډېره یاده شوې یې
مورې نن مي کار ته اشتها نه راځي

باركوال:
دلته د هر چا توپك په لاس كې دى
زاڼې هم د سولې په دا نه راځي

ژوندون:
خداى خبر چې څه بلا پرېوتې ده
زیړ مازدیګر راشي لیلا نه راځي

سقيم:
اوس لکه چې پيغلو ملا وپېژاند
اوس جومات ته غوړه حلوا نه راځي

نعيم افغان:
اې د ټولو یاره! دا څه چل شوی
ولې کندهار ته « ښکلا» نه راځي؟

(۱) دټولویار= محمدیار/// ښکلا= مجله

عماد دوران:
ګوره زمانه انتظار نه کوي
يو ځلې چې لاړه شي بيا نه راځي

باركوال:
ولې مو د علم لمر پرېوتى دى
ولې زموږ كور ته روڼا نه راځي؟

عماد دوران:
څوک وايي چې ستا له سيالۍ کم يمه
ماته د وخت کومه ادا نه راځي؟

افغانمل:
ستا د زړه هېواد به اخير فتح کړي
اوښکې پښتنې دي پر شا نه راځي

باركوال:
پت به د دې خپلې پښتو وساتو
بې له دېنه ښكلې ليلا نه راځي

سقيم:
نن شپه به کېداى شي چې د قدر وي
زموږ څراغ بلېږي هوا نه راځي

ژوندون:
ستا په خیال د شونډو خوړل څنګه دي
زه خو وایم دې کې ګنا نه راځي

باركوال:
تل چي باركواله! سره يو، يو موږ
بيا به مو پر مېنه وبا نه راځي

درنو لوستونكيو! هيله ده چي له دې سملاسي (فى البديهه) مشاعرې څخه مو خوند اخيستى وي، كه زما په شمول زما د شاعرانو يارانو په پورتنيو بيتونو كې د فكر يا د شعر د جوړښت له پلوه كومه نيمګړتيا په مخه درغلې وي، نو بخښنه راته وكئ، ځكه چي دا بيتونو يو په بل پسې تر ډېر لږ فكر كولو وروسته ليكل شوي دي، تاسې به واياست چي د داسې شعرونو ليكل نو څه ګټه لري، زه وايم چي كه په دغو بيتونو كې تاسې لږ څه هم نوې خبرې ليدلې وي خو ښه تر ښه كه نه وي دا ډول سملاسي مشاعرې د ځوانو شاعرانو لپاره د شعر د رياضت، پخوالي او د شعر د اصولو په برخه كې ښه مرسته كولاى شي.