لراوبر ویب پاڼه لراوبر يو افغان – تازه خبرونه
٢٠٠٨ مارچ١٣
ائتلافي ځواکونه وايې چي د هلمند د ګرمسېر په ولسوالۍ کي د ګڼو وسله والو طالبانو تر څنګ څلور تنه ولسي خلک هم وژلي او څو تنه يې ټپيان کړي دي .
وسله وال طالبان د خپلو ملګرو وژل کېدل نه مني او ادعاکوي چي بهرنيو ځواکونو پر يوه کلي د يرغل پر مهال شل تنه ولسي خلک وژلي دي .
په عين حال کي د افغانستان د ملي دفاع وزارت د يوې خبرپاڼي له لاري د سنګين په ولسوالۍ کي د وسله والو طالبانو سره د جکړې پر مهال د لسو ځانمرګو بريدکوونکو د واسکټونه د نيول کېدو خبر ورکړى دى .
د هلمند په ګڼو سيمو کي تاوتريخوالى روان دى او د تازه پېښو ډېرى قربانيان ولسي خلک دي چي ښځي او کوچنيان هم په کي شامل دي .
ائتلافي ځواکونه وايې چي له دريو ورځو را په دېخوا يې د ګرمسير په ولسوالۍ کي د وسله والو طالبانو د ځپلو په موخه پوځي عمليات روان دي .
د انګرېزانو وياند سايمن ميلرد چهار شنبې په ورځ آريانا ټلوېزيون ته وويل چي د ګڼو وسله والو طالبانو تر څنګ يې څلور تنه ولسي خلک چي ښځي او کوجنيان هم پکي شامل دي وژلي او څو تنه يې ټپيان کړي دي ، چي وروسته يې ټپيان خپل يوه روغتون ته ددرملني لپاره لېږدولي دي .
وسله وال طالبان ددوئ او بهرنيو ځواکونو تر منځ د رواني جګړې د پخلي تر څنګ د خپلو ملګرو وژل کېدل نه مني ، طالب وياند قاري يوسف احمدي ادعاکوي چي بهرنيو ځواکونو د ځايې خلکو پر يوه کلي يرغل ور وړى او شل تنه ولسي خلک يې وژلي دي .
په عين حال کي د افغانستان د ملي دفاع وزارت د يوې خبرپاڼي له لاري د هلمند د سنګين په ولسوالۍ کي د وسله والو طالبانو څخه د نښتې پر مهال د لسو ځانمرګو بريد کوونکو د واسکټونو د نيول کېدو خبر ورکړي دي .
په خبرپاڼي کي ويل سوي چي په دغه پېښه کي چاته ځاني زيان نه دى اوښتى .
وسله والو طالبانو د سنګين ولسوالۍ د نښتې په اړه څه نه دي ويلي .
سنګين د هلمند له ډېرو نا امنو ولسواليو څخه ده چي ډېري خلکو يې د جګړو له ويري خپل کورونه پرې ايښي دي او نورو سيمو ته يې پښې سپکي کړي دي .
