د کندهار ولايت دملي امنيت رياست منسوبينو د تيري اوونۍ په اوږدو کي د عملياتو پرمهال هغه تن چي د پاکستان هيواد د وسلوالو پوځونو او دولتي چارواکو څخه يې لسګونه ميله وسلې رانيولي او افغانستان ته يې د جګړې لپاره راوړي وې نيولى دى.
دغه کس تېره ورځ د ملي امنيت په رياست کي خبريالانو ته د وسلو سره يو ځاى وښودل سو او نوموړي له رسنيو سره د خبرو پرمهال پر خپل جرم اعتراف هم وکړى.
ددې کس تر څنګ تېره ورځ هغه نور پنځه تنه هم چي د تيري اوونۍ په اوږدو کي د بيلا بيلو جرمونو په خاطر نيول سوي ول رسنيو ته وښودل سول.
په نيول سوو شپږو تنو کي دوه تنه د هلمند، يو تن د اروزګان او پاته درې تنه د کندهار ولايت اوسېدونکي دي چي د تيري اوونۍ په اوږدو کي د ملي امنيت رياست د منسوبينو لخوا د عملياتو پرمهال نيول سوي دي.
په دې کسانو کي د عبدالصمد په نوم يو هغه تن هم شامل دى چي ٨١  ميله سپکي او درنې وسلې يې د پاکستاني پوځ او ملکي ادارې له يو شمېر منسوبينو څخه پلورلي او بيا يې افغانستان ته د جګړې لپاره راوړي وې.
پاته نور پنځه تنه هم چي د ملي امنيت رياست لخوا نيول سوي پر خپلو جرمونو يې د رسنيو په وړاندي اقرار وکړ او له دولته يې وغوښتل چي ورته عمومي بخښه اعلان کړي.
په دې کسانو کي د محمد رفيع په نوم هغه نفر هم نيول سوى چي د کندهار د هوايي ډګر لوري ته يې شپږ فيره راکټونه توغولي ول او هڅه يې کول چي په کندهار ښار کي امنيت ګډ وډ کړي.
د ملي امنيت رياست منسوبينو له دې وړاندي هم په کندهار ښار او ولسواليو داسي وسلوال چي په پاکستان کي روزنه ورکول سوې او رالېږل سوي ول نيولي دي.