خیبر ايجنسۍ د باړې تحصیل مرستیال پولیټیکل اېجنټ محمد ناصر رسنيو ته ویلي دي چې ((د جمعې پر ورځ د خیبر اېجنسۍ په لرې پرته سیمه تیرا میدان کې د انصار الاسلام او تحریک طالبان پاکستان ترمنځ په نښتو کې خوا وشا ۳۲ کسان وژل شوی دی،او یوشمېر ژوبل شوي دي، او دغه شمېر نور هم زیاتېدای شي.))نوموړي وویل: ((د دواړو ډلو ترمنځ په تیرا کې پر یو شمېر مورچو باندې نښتې روانې دي او په یو بل درنې او سپکې وسلې کاروي.)) په روانو نښتو کې د مرګ ژوبلې په اړه له دواړو خواوو متضادې دعوې مخې ته راغلې دي.د انصار الاسلام وسله والې ډلې یو ویاند وايي، په دې نښته کې د دوی ۲۳ کسان وژل شوی دی چې یوازې ۸ یې خپل رضا کار دي او نور یې ولسی ملاتړی ول.ویاند ادعا کوي، دوی هم له ۳۰ زیات طالبان وژلي دي، او درې یې ژوندي نیولي دي.خو طالبانو په خپله د انصار الاسلام د دغو ادعاو او شمیر په اړه څه نه دي ویلي.هلته د خیبر دولتي چارواکی وایې، یوازې نهه طالبان په کې وژل شوي دي خو بیا ازادې سرچینې وایې دغه دواړو خواوو ته اوختی شمېر له ۴۰ هم زیات دی.