مونږ د کابل پوهنتون د اجتماعي علومو د پوهنځي محصلین ددغه پوهنځۍ په نوم د هغو محدود محصلینو اعتراض چې له څو ورځو راهېسې د افغانستان د پارلمان په مخکې دوام لري، په کلکه د نورو اکثریت محصلینو د حقوقو، د درسي ماحول، د پوهنتون د علمي او اکاډمیک چاپيریال په ضد، قومي، سیاسي او د خاینانه کړیو په لاس توطئیه بولو، دغه محصلین چې یوازې یوه قوم پورې تړاوو لري، د نورو ټولو درنو قومونو محصلین په سپکه یادوي، ددې پوهنځۍ استادان په ناځوانه تهمتونو د هغوی حیثیتونه پایمالوي او بالاخره پدغو اعتراضونو پوهنتون په سیاسي انګړ بدلوي.
مونږ لاندې غوښتنې لرو چې د افغانستان ملي شورا، ولسي او مشرانو جرګو، د لوړو زده کړو وزارت او د کابل پوهنتون درانه ریاست ته یې وړاندې کوو.

۱: مونږ د کابل پوهنتون د اجتماعي علومو د پوهنځي محصلین هیڅ ډول تاوتریخوالی، بې نظمي او په درسي جریان کې اخلال نه منو او نه یې غواړو، د خپلو درسونو ادامه او هره ډله چې د درسونو جریان ته صدمه رسوي، مخالفت کوو.

۲: مونږ د هر ډول مداخلې او تفرقې مخه نیسو، او هغه څېرې چې دغه محصلین هڅوي په ځانګړي ډول د پارلمان غړي جعفر مهدوي، عارف رحماني، د کابل پوهنتون مرستیال ددغو مداخلو غندنه کوو.

۳: مونږ د اجتماعي علومو د پوهنځي محصلین ددغه پوهنځي د رئيس صاحب، فاروق عبدالله او د استاد فیصل امین د حیثیت اعاده غواړو، د نورو درنو استادانو احترام غواړو.

۴: له ښځو سره د تاوتریخوالي خبرې کیږي، د تاسف ځای دی چې د یوه پوهنځي انجونو ته سپکاوی کیږي د هغوی په وړاندې تاوتریخوالی کیږي ولې بیا هم د ښځو د حقوقو ځېنې مدافعین او په نوم مدنې ټولنې چې د همدوی د قوم پورې تړلي دي، نه یوازې چې د هغه ښځینه محصلینو چې پدغه پوهنځۍ کې زده کړي کوي، د سپکاوي له خشونت وژغوري لا هم ددغو تاوتریخوالو د عاملینو ننګه کوي چې دا د دوی د خبرو او عمل ترمنځ توپیر ښيي.

۵: مونږ د اجتماعي علومو د پوهنځي محصلین ددغه پوهنځۍ د رئیس صاحب فاروق عبدالله او استاد فیصل له لرې کولو سره مخالف یو، که د محصل له اړخه د پوهنتون د استاد او رئيس د لرې کولو لړۍ پیل شي لرې نده چې پدې مرض به ټولې پوهنځۍ او اکثریت پوهنتونونه اخته شي.

۶: مونږ د اجتماعي علومو د پوهنځي محصلین د تدریس له جریان، د استادانو له ښې رويې، د استادانو اخلاقي کړه وړه، او په امتحانونو کې له شفافیت خوښ یو، هر ډول اعتراضات چې مغرضانه وي او عدالت پکې نه وي او د نورو محصلینو حق پکې خوړل کیږي په شدت سره محکوموو.

۷: مونږ د اجتماعي علومو د پوهنځي محصلین له لويي څارنوالۍ غواړو، د هغو تهمتونو چې ددغې پوهنځۍ په رئیس، استادانو لګېدلي، و څیړي. که دغه تورونه ثابت نه شي نو دغه معترضه محصلینو ته دې سزا ورکړل شي ترڅو په اینده کې د یوه استاد، محصلینو او رئیس سپکاوی ونه شي.

۸: مونږ د اجتماعي علومو د پوهنځي محصلین له هغو مدني ټولنو نه چې پدغه موضوع کې نا اګاهانه مداخله کړې جدا غواړو چې د چا د دسیسو ښکار نه شي، دا ډول ځینو رسنیو چې غیری متوازن راپورونه ورکړي مونږ ترې غواړو د رسنیو د معیارونو په اساس غیری متوازن راپورونه ور نه کړي او د یوه محصل حق ته احترام وکړي.

۹: که زمونږ حقه غوښتنو ته پام و نه شي او ددغه پوهنځي دغوټ اکثریت د محصلینو غږ وانه اورېدل شي نو له خپلو حقوقو به لاس وانخلو او اعتراضاتو ته به ادامه ورکړو.