د کابل چاپ اکثرو ورځپاڼو په خپلو نننیو ګڼو کې کابل ته د پاکستان د صدراعظم نواز شریف د سفر به اړه مقالې او تبصرې خپرې کړي دي.

ملي ارمان:

د ملي ارمان ورځپاڼې د سرمقالې سرلیک دی، ایا پاکستان د افغانستان د سولې اهمیت درک کړی دی؟

د سرمقالې لیکوال باور څرګند کړی چې؛ اوس د پاکستان له ملکي حکومت سربیره نظامیانو هم په افغانستان او سیمه کې د سولې او ثبات اهمیت درک کړی دی.

ملي ارمان لیکلي، دوی پوه شوي دي چې که په سیمه کې د دوی په لاس لګول شوی اور مړ نه شي؛ نو پاکستان به هم په کې وسوځي.

د سرمقالې لیکوال تمه ښودلې چې؛ کابل ته د نوازشریف سفر د افغانستان او پاکستان په اړیکو کې یو نوی فصل پرانیزي.

سرنوشت:

سرنوشت ورځپاڼې تر دې سرلیک لاندې خپله سرمقاله لیکلې؛ د افغانستان روانه جګړه او د پاکستان ناوړه راتلونکې.

په سرمقالې کې راغلي پاکستاني چارواکي په افغانستان کې د سولې له پروسې سره د مرستې ژمنې بیا بیا تکراروي؛ خو تراوسه یې په دې اړه عملي اقدامات نه دي کړي.

سرنوشت لیکلي، سره له دې چې د افغانستان د جګړې د اور لمبې ترپاکستان رسیدلي؛ خو د دې هیواد پوځي چارواکي لا هم د افغانستان له امن او ثبات سره مرسته نه کوي.

ورځپاڼې لیکلي که په تیرو دولسو کلونو کې پاکستان او ایران په د افغانستان په چارو کې د لاسوهنې پرځای مرسته کړې وه؛ نن به امنیت ټینګ و او د بهرنیو عسکرو پاتې کیدو ته به اړتیا نه وه پاتې.

محور:

محور ورځپاڼې هم په خپل لومړي مخ کې کابل ته د نوازشریف د سفر په اړه یو تحلیلي مطلب خپور کړی دی.

په مطلب کې راغلي، پاکستان هڅه کوي چې، د طالبانو پروژه داسې مدیریت کړي چې؛ د امریکا د رابطې امکان په کې کم وي.

د مقالې د لیکوال په باور پاکستان اوس له امریکا سره ژور اختلافات لري؛ ځکه خو یې صدراعظم د افغانستان په ګډون د سیمې هیوادونو ته سفرونه پیل کړي دي.

محور په یوه بل مطلب کې پرته له دې چې کومه سرچینه ذکر کړي؛ لیکلي، د سولې د عالي شورا یوه پلاوي په کراچې کې له ملا برادر سره کتلي دي.

ورځپاڼې د پاکستانیو ورځپاڼو په حواله لیکلي چې؛ دا کتنه یوازې یوه دقیقه وه هغه هم د پاکستانیو پوځیانو تر سختې څارنې لاندې.

هېواد:

هیواد ورځپاڼې په خپلې سرمقالې کې لیکلي چې؛ دا ځل باید د پاکستان د صدراعظم د ژمنو د عملي کېدو لارې وڅارل شي.

ورځپاڼې د ولسمشر حامد کرزي وروستي خبرې راخیستي؛ چې ویلي یې دي، د افغانستان سوله لومړی د امریکا او بیا د پاکستان په لاس کې ده.

ورځپاڼې لیکلي چې، ولسمشر حامد کرزي د پاکستان له صدارعظم نه غوښتي چې؛ ملا برادر په بشپړه توګه ازاد کړي.

هیواد د خپل لومړي مخ په یوه غټ سرلیک کې د ښاغلي نواز شریف خبره هم راخیستې چې ویلي یې دي؛ پاکستان به د افغانستان د سولې په بهیر کې اسانتیاوې رامنځ ته کړي.