د پښتونخوا د نيشنل عوامي ګوند د مشر اسفنديار ولي خان ورور سنګين ولي خان له نړۍ څخه وكوچېد.
ارواښاد سنګين خان چي د سرطان په ناروغۍ اخته و، تېره شپه يې تر اوږدې درملني وروسته د لاهور په شوكت خانم روغتون كي ساه وركړه.
ويل كېږي چي د نوموړي د جنازې مراسم به نن ماځيګر د هغه په پلرني كلي كي ادا سي.
ارواښاد سنګين ولي خان د پښتنو د ملي مبارز ارواښاد خان عبدالولي خان او پښتنې سياستوالي آغلي بېګم نسيم ولي خان زوى او د فخر افغان پاچاخان (خان عبدالغفار خان) لمسى او د نيشنل عوامي ګوند د اوسني مشر اسفنديار ولي خان ميرېزى ورور و.

د لر او بر ويبپاڼي اداره د لر او بر افغان ولس سره دې غم كي ځان شريك بولي، د ارواښاد درنې مور بيګم نسيم ولي خان، ورور يې اسفنديار ولي خان او د كورنۍ ټولو درنو غړو ته يې د لوى خداى (ج) له درباره جميل صبر او ارواښاد سنګين ولي خان ته جنتونه غواړي. آمين