پروفيسر ډاکټر عبدالرازق پالوال د افغانستان په کچه د پښتو ژبپوهاند او د ادبياتو د څانګي وتلی عالم دی خو په دې وروستيو کي د روغتيا، نامناسبي سرپنا او د مسلکي تحقيقاتو د بشپړولو لپاره د لږترلږه اسانتياو څخه د محروميت له امله په خورا ځوروونکي چاپيريال کي ژوند کوي.
نوموړي په خپله وروستۍ ليکنه او شعر کي د خپل نامناسب چاپيريال ځيني بېلګي په انتقادي بڼه ليکلي وې چي پر لراوبر ويبپاڼه خپرې سوي چي د استاد پالوال خواخوږو او با احساسه افغانانو يې په اړه د خپګان څرګندوني وکړې.
يو له دغو افغانانو څخه په متحده عرب اماراتو کي مېشت حاجي احمد خان اڅګزی دی.

نوموړي د خپل قام او هيواد په کچه د وتلي عالم پروفيسر پالوال پر روغتيايي او علمي چارو کي د خنډ او ځنډ پر حالت د خپګان تر څنګ لومړی د لراوبر ويبپاڼي له ادارې او بيا په کندهار کي د باچاخان بنسټ د څانګي له مسول انجنير شيرشا رشاد سره د استاد پالوال په اړه خبري وکړې او د نوموړي سره يې د روغتيايي خدمتونو، مناسبي سرپنا د چمتو کولو او د نوموړي د دوو ناچاپو کتابونو د چاپ په برخه کي د همکارۍ ژمنه وکړه.
ښاغلی پالوال په کندهار کي د خپلو دوستانو د کور په يوه سړه او تياره خونه کي ژوند کوي چي په ټوله ورځ نيم ساعت د لمر وړانګي نه ور رسيږي.
کتابونه يې د همدې کور په يوه بالاخانه کي پراته دي چي استاد يې د ناروغۍ له امله نه ورختلائ سي او نه راکښته کيدلای سي.
دې ته ورته نوري ستونزي هم دي چي زموږ دروند استاد په خپل ښار او خپل هيواد کي چي ټول ژوند يې خدمت ته وقف مړی دی او اوس هم تحقيق او څېړني کوي ، ځوروي او کله خو يې د بيوسۍ اوښکي هم تمي نسي.
هالنډ ميشتی افغان انجنير ذکريا پوپل وايي:
"د پالوال صاحب په دغه حالت سخت د خواشینی سوم. 
زه پر حکومت او د کندهار پر شتمنو خلګو ږغ کوم، چي ددغه ستري هستی لاسنیوی وکړي، کتابونه ئې ورته چاپ کړي او د صحي او مادي ستونزو په حل ورسره مرسته وکړي.پالوال صاحب د کندهار او افغانستان لویه هستي ده او پالل ئې د هر افغان او کندهار دنده ده."

ډاکټر شاولي پوپل چي د نړيوال روغتيايي سازمان د افغانستان د څانګي کارکوونکی دى وايي "دمحترم پالوال صاحب په ناروغی اوستونزو ډیر خفه سوم ، زموږ ټولو دنده ده چي دپالوال صاحب و لوري ته پاملرنه وکړو همدارنګه داطلاعاتو اوکلتور ریاست او وزارت په دې هکله مسؤلیت لري. زه مطمئن یم چه کندهاریان حتما دمحترم پالوال صاحب خدمت کوي ."

د ډيورنډ د پوري غاړي ګلستان اوسيدونکي، قومي مشر او مخور شخصيت ښاغلی احمدخان اڅګزي هم د ډاکټر پالوال پر حال خواشيني څرګنده کړيده او له لراوبر ادارې يې غوښتي چي غواړي پر پروفيسر پالوال د هغه د ناروغۍ پوښتنه وکړي او د روغتيا، دده د خوښي وړ مناسب کور په کرايه کولو او د کتابونو په چاپ کي د هغه لاسنيوئ وکړي.

ښاغلي احمدخان اڅګزي لراوبر ته وويل " پروفيسر پالوال غوندي اشخاص زموږ د وطن سرمايه ده، په لومړي ګام کي به د استاد روغتيا او له اوسنۍ سړې او بې لمره خوني څخه  يو د اړتيا وړ اسانتياو لرونکي کور ته د هغه د ليږدولو د پاره هڅي وسي او په دوهم قدم کي د استاد له ارمان سره سم هغه ته د کتابونو د چاپ مالي امکانات په واک کي ورکړه سي.
ښاغلي احمدخان وويل چي که د روغتيا په برخه کي له هيواده بهر ته تګ ته اړتيا وي هم يې همکارۍ ته تيار دی.