نوميالی ليکوال جعفر خان اڅګزی په حق ورسيد

د پښتو او اردو ژبو نامتو ليکوال او کالم ليکونکی جعفر خان اڅګزی د ورپېښي ناروغۍ له امله پرون ( ۹ جنوري ۲۰۰۹ ) د کوټي په سرکاري روغتون کي په حق ورسيد .

 د لراوبر ويبپاڼي د سهيلي پښتونخوا همکار بوريوال کاکړ د خبر له مخي نوموړي خپل د ژوند زياته برخه د پښتو ژبي او پښتون قام د پرمختګ او ترقۍ لپاره وقف کړې وه ، ارواښاد نه يوازي خپل قام ته په پښتو ژبه خدمت کړی بلکي په اردو ژبه يې هم نورو ته د خپل قام او ژبي دورپيژندلو په لاره کي د پام وړ خدمتونه کړي دي .

په دې اړه نن ۱۰ جنوري ۲۰۰۹ پښتو ادبي غورځنګ دارواښاد جعغر خان اڅګزي روح ته ددعا او ياد د پاره  په کوټه کي يوه تعزيتي غونډه رابللې وه ، ، په دې غونډه کي د ملګري ليکوال کوټه ، خپلواک ادبي ټولنه کوټه او پښتو ادبي غورځنګ غړو برخه اخستې وه ، ښاغليو : صادق ژړک ، نعيم ازاد ، عين الدين لمبه ، اغا جان همدرد ، قاسم ابدال ، محسن حسني ، ثناءالله زلمي ،يوسف سايل او يو شمېر نورو دارواښاد جعفرخان  اڅګزي پر ژوند ، اثارو اوخدمتونو خبري وکړې  .

د پښتو ادبي غورځنګ مشر صادق ژړک د لراوبر سره په خبرو کي وويل : د نوموړي په ټولو اثارو کي  سوالاً جواباً ځان ته بېل ځای او مقام لري ، دا ځکه چي دی د يوې موضوع په اړه سوال هم خپله کوي اوهم جواب  خپله وايي ، دا په نړيوال ادب کي بېساري کار و چي د سيمي  او  پښتوپه ادبياتو کي تر ده مخته چا نه دی کړی .

د صادق ژړک په وينا نوموړي د يوې درې کورنۍ سره تړاو لري ، دده پلارارواښاد ايوب خان اڅګزی هم د پښتو ژبي يو تکړه ليکوال، مبارز  او د يوه ډير ځانګړي استعداد لرونکی انسان و ، د خورجين په نوم اثر د ايوب خان د مهمو اثارو څخه شمېرل کيږي ،د جعفر خان پلار ايوب خان اڅګزی داعليحضرت ظاهر شا په پاچهي کي د پښتونستان تحريک پر مهال په کابل کي و  .

ارواښاد جعفرخان اڅګزي د سيمي له زيات شمېر ورځپاڼو او مجلو سره قلمي  همکارۍ تر څنګ يو شمېر  مهيم اثار ليکلي دي ، د لراوبر ويبپاڼي اداره او ټول همکاران د نوموړي پر مړينه خواشيني څرګندوي ، د نوموړي له کورنۍ او ټولو خواخوږو سره په دې غم کي ځان شريک ګڼي او له پا ک خدای څخه يې روح ښاد او ياد تلپاتي غواړو .

د لراوبر ويبپاڼي د سهيلي پښتونخوا څانګي له خوا د ارواښاد تفصيلي ژوندليک وروسته پرليکه کيږي ، لوستل يې مه هېروئ .