په واشنګټن کي د امريکا د څلورڅلوېښتم جمهور رئيس د لوړي تاريخي
مراسم ترسره سول.
دې مراسمو ته د امريکا له متحده ايالتونو او د نړۍ له بېلابېلو
هيوادونو څخه ٢٤٠٠٠٠ کسان په رسمي توګه بلل سوي وو او د دوو ميليونو په
شاوخوا کي کسانو له نيژدې وکتل.

خبرونه وايي له افغانستان څخه هم د دغه هيواد راتلونکو
انتخاباتو ته احتمالي کانديدان پوهاند ډاکټر اشرف غني احمدزى، ډاکټر علي احمد
جلالي، ګل آغا شېرزى او ډاکټر عبدالله عبدالله په رسمي توګه بلل سوي دي .
د
باراک اوباما د لوړي مراسم يوازي امريکايان نه، بلکي د نړۍ زياتره خلګ يې شېبه په
شېبه د تلوېزونونو او راډيو ګانو په ذريعه تعقيبوي.

د امريکا د افريقايي الاصله ولسمشر د لوړي مراسم د ده په پلرني
هيواد کينيا کي هم په دولتي او ملي سطحه له نيژدې څارل کېږي.
د کينيا حکومت د ده
په پلرني ښار کي يو غټ تلوېزون ايښئ او هم نژاده ښاريان يې د خوشحاليو او احساساتو
په څرګندولو د نړۍ د ځواکمن کس د لوړي مراسم پکښي ګوري.
همدا راز د انډونيزيا په
جاکارتا ښار کي دغه مراسم په ټلوېزونونو کي کتل کېږي، چي نوموړي يو وخت ښوونځى پکښي
ويلى وو.
د لوړي په مراسمو کي د امريکا پخواني جمهور رئيسان جيمي کارټر، جارج
ډبليو بوش، بيل کلنټن او د دوى مېرمني هم په لومړي کتار کي ليدل کېږي.
د
امريکايي پوځ لوړ پوړو چارواکو، قاضيانو، د متحده ايالاتو واليانو او د بهرنيو
هيوادونو سفيرانو هم په دې مراسمو کي ګډون کړى دئ.
په امريکا کي د افغانستان
سفير سيد طيب جواد هم دې مراسمو ته وربلل سوى او د ټلوېزون پر پرده
مالومېږي.
 د هاليووډ فلمي او هنري ستوري هم ورغلي چي د لومړني تور پوستي
مشر د لوړي مراسم له نيژدې څخه وګوري.
د واک د انتقال رئيسه هيئت وايي دا مراسم
د امريکا په تاريخ کي بېساري دي چي له ١٧٨٩ کال راهيسي د جارج واشنګټن د واکمنۍ له
مهاله لمانځل کېږي.
په دې مراسمو کي د عامو امريکايانو په منځ کي هم د هر نژاد
کسان تر سترګو کېږي، سره، سپين او تور پوستي، ځوانان، ښځي او بوډاګان ټول له يو بل
سره ګډ د خپل نوي ولسمشر لومړنۍ وينا ته غوږ دي.
د لوړي په مراسمو کي اول
مرستيال ولسمشر جوزيف بايډن او وروسته منتخب ولسمشر باراک اوباما د قاضي القضات جان
رابرټس په خوله د امريکا د جمهور رئيس په توګه لوړه وکړه.
پخوانى ولسمشر ډبليو
بوش د خپلي واکمنۍ په وروستۍ ورځ فقط د يوه نندارچي حيثيت لري او د سپيني ماڼۍ د
لوجستيک مامورين اخته دي چي له ماڼۍ څخه د نوموړي سامانونه ټول او د ولسمشر باراک
اوباما دا ځاى پر ځاى کړي.
ټاکل سوې ده چي ډبليو بوش او مېرمن يې لارا بوش به د
لوړي تر مراسمو يو ساعت وروسته خپل پلرني ايالت ټکساس ته په الوتکه کي روان سي او
باراک اوباما به د سپيني ماڼۍ له لوړ پوړو مشرانو سره د غرمې ډوډۍ وخوري.
د
امريکا د جمهور رئيس باراک اوباما راتګ ته افغانان ځکه اميدوار دي، چي د انتخاباتي
کمپاين پر وخت يې د افغانستان په باب د امريکا د جنګي پاليسۍ د تغير ژمنه کړې او
وايي په دې هيواد کي به د سولي د ټينګېدو دپاره هلي ځلي وکړي.
اوباما وايي له
عراق څخه به امريکايي پوځيان وباسي او افغانستان ته به ٣٠٠٠٠ تازه دمه پوځيان
ولېږي.
امريکايان وايي دوى ډېر خوشحاله دي، چي په هيواد کي يې نژادي تعصبونه له
منځه تللي او د هيواد مشر يې د نژادي برترۍ پر اساس نه، بلکي د پوهي او لياقت پر
بنسټ ټاکل کېږي.
تور پوستان په امريکا کي اقليت دي، چي ٦٣ کاله پخوا يې په دې
هيواد کي د رايي اچوني حق نه درلود، خو امريکايان وايي نن هغه ورځ ده چي ولسمشر
براهام لينکن ١٦٥ کاله پخوا غوښته.

باراک اوباما په اصل افريقايي، په نژاد تور پوستى، مور يې د
امريکا عيسوۍ او پلار يې د افريقا مسلمان وو، چي د جنوري پر شلمه د امريکا د لومړني
تور پوستي جمهور رئيس په توګه سپيني ماڼۍ ته ننوت.
امريکايان هيله من دي، چي
باراک اوباما به د دې هيواد هغه پخوانى برم بيرته راژوندى کړې، چي د پخواني ولسمشر
ډبليو بوش د ناکامو پاليسيو له وجي يې بايللى وو.

کارپوهان وايي د امريکا خراب اقتصاد، د عراق، افغانستان او د
غزې جنګونه هغه غټي ستونزي دي چي د پخواني ولسمشر ډبليو بوش څخه په ميراث ور پاته
دي او نوموړى به د خپلي واکمنۍ پر مهال ورسره مخ وي.

د يادوني وړ ده چي په دې مراسمو کي د نړۍ تر ټولو مشهور سوک
غورځوونکي ( باکسر ) محمد علي کيلي هم برخه اخستې وه .

د
امريکا د نوي ولسمشر بارک حسين اوباما بيانيې متن

دبارک اوباما کابینه