طالبانو دکندوز د چاردرې په ولسوالي کي د جرمني پوځيانو پر مرکز بريد کړی دی چي د لمړنيو راپورونو پر اساس درې جرمني عسکر پکښي وژل سوي او پنځه نور ټپيان سوي دي .

ولسوال عبدالواحد عمرخېل جګړه تائيد کړه خو د مرګ ژوبلي په اړه يې ناخبري وښوده ، نوموړی وايي چي جګړه لومړی د عيسی خيلو په کلي کي رامنځته سوه .

يوه سيمه ايز چارواکي لراوبر ته وويل چي په دې جګړه کي سيمه دطالبانو يو قومندان هم ټپي سوی دی او يو شمېر کورونه د څرخکو د بمباريو پر مهال نړېدلي دي .

دجرمني پوځيانو وياند ومنله چي د طالبانو سره د نښتي په پايله کي درې جرمني پوځيان مړه او پنځه نور سخت ژوبل سوي دي ، د جرمني پوځ وياند له قوله جګړې تر پورتنۍ مرګ ژوبلي وروسته يې هم دوام درلود .

دا چي په دې جګړه کي ملکي خلکو ته د ځاني او مالي زیان کچه څومره ده ، تر اوسه نه ده معلومه .