روسيه: په افغانستان کي عملياتو ته دوام ورکوو
په کابل کي د روسيې سفير ويلي چي په افغانستان کي عملياتو ته دوام ورکوي.
د روسيې نماينده ويلي چي د افغانستان په شمال کي ډېرېدونکي تاوتريخوالي دوى اندېښمن کړي دي، چي د دوى پر هيواد باندي تاثير کوي.
د روسيې استازي ويلي چي دوى به د ناټو له ځواکونو سره يو ځاى په افغانستان کي د مخدره موادو پر ضد په عملياتو کي ګډون کوي، لکه تېره مياشت کي په ننګرهار کي ترسره سول.
د تيري مياشتي په عملياتو کي د روسيې د عسکرو ګډون ته ولسمشر کرزي سخت غبرګون وښودئ، خو د روسيې استازى وايي له افغان حکومت سره يې ستونزي هواري کړي دي.
د روسيې سفير وايي د ولسمشر کرزي توند غبرګون پر ناسمو معلوماتو ولاړ وو، او دوى هغه عمليات د افغانستان د کورنيو چارو د وزارت سره په همږغۍ ترسره کړي وو، خو د افغانستان د کورنيو چارو وزارت تېره مياشت په دې عملياتو کي د روسي عسکرو له ګډون څخه ناخبري ښودلې وه.