دسرشمېرني ځنډولو په اړه د وزيرانو شورا د پرېکړې هرکلی کوو !
د سرشمېرنې د ځنډو لو په اړه د افغان کلتوري ټولنو د جرګې اعلاميه
کابل ۲۶ غویی ۱۳۸۷
د افغان کلتوري ټولنو جرګه دسرشمېرنې د ځنډولو په اړه د افغانستان د وزيرانو شورا د پرونۍ پرېکړې تود هرکلی کوي او هغه يو ډېر پر ځای او معقول ګام ګڼي . د پرېکړې په دلايلو کې د هغه سيمينار پر نظرياتو او پرېکړه ليک هم استناد شوی ، چې د ثور په 26 مه نېټه د کابل په انټر کانټيننټل هوټل کې د افغان کلتوري ټولنو جرګې ، هندارې کلتور ي او مطبوعاتي بنسټ ،د ويښ ځوانانو ټولنې ، د قومونو د ملي يووالي شورا او سولې ملي جرګې له خواپه ګډه جوړ شوی و .
د افغان کلتوري ټولنو جرګه له خپلو ټولو هڅاندو غړو ، د پوهنتون له قدرمنو استادانو ، په ځانګړې توګه پوهاند محمد بشير دوديال او استاد لطف الله ساپي څخه او همدارنګه د ملي شورا له هغو درنو غړو څخه ، چې د نيمګړې او بې وخت سرشمېرنې په وړاندې کمپاين کې يې په ډېر اخلاص برخه واخېسته د زړه له کومې مننه کوي .
دارواښاد فضل الرحمن څمکني ځانګړې يادونه هم پر ځان پور ګڼو ، چې زموږ په کمپاين کې يې فعاله ونډه درلوده او په ډېره ډاډ يې ويل ، که موږ يې ونه غواړو هېڅوک به سرشمېرنه ترسره نه شي کړای ؛اروا دې يې ښاده وي . همداراز موږ يو شمېر هغو ښاغلو ته ، چې د ولس پر ارادې بې باوره وو او د سرشمېرنې ترسره کېدل يې حتمي او د مخنيوي هڅې يې بې ګټې ګنل ، په ډېر درنښت يادونه کوو ،چې د ولس په اراده کې ډېر ځواک پروت وي او هغې ته بايد په ټيټه سترګه ونه کتل شي .
د افغان کلتوري ټولنو جرګه د دې تر څنګ ، چې د سرشمېرنې د ځنډولو پرېکړه پرځای او عادلانه ګام ګڼي، خو کافي يې نه بولي ، بلکې يو ځل بيا په ډېر ټينګار وړانديز کوي ، چې :
۱ ـ تر هر څه دمخه بايدد سرشمېرنې په مرکزي اداره کې ژور سمونونه پلي شي او دافرادو په استخدام کې د قومي، ژبني ، سمتي او ګوندي تمايلاتو پر ځای اهليت ، مسلکي وړتيا او بې پرېتوب د اصلي معيارونو په توګه په پام کې ونيول شي .
۲ ـ د سرشمېرنې مرکزي اداره بايد په بشپړه توګه غير سياسي او غير ګوندي شي او د سرشمېرنې د څارنې لپاره په ملي کچه يو څارنيز کميسون جوړ شي .
۳ ـ سر له اوس څخه په ولايتونو کې د حياتي احصايې او سرشمېرنې سيمه ييز دفترونه جوړ او فعال شي او د کدرونو د مسلکي روزنې لپاره منظم پروګرامونه پلي شي .
۴ ـ دسرشمېرنې په پروسه کې د ايران او هربل ګاونډي او يا مغرضو هېواد ونود لاسوهنو مخه ونيول شي او پر ځای يې له پرمختللو او بې پرې هېواد ونو څخه مرسته وغوښتل شي .
۵ ـ دسرشمېرنې د پايلو د ډبل چېک او کنټرول لپاره دقيق مېکانيزم رامنځته شي او د سرشمېرنې د ترسره کولو پرمهال نړيوالو ناظرينو ته بلنه ورکړل شي .
۶ ـ سرله اوسه د سرشمېرنې په اړه د عامه پوهاوي کمپاين پيل شي او په دې لاره کې له رسنيو ، سيمينارونو ، ورکشاپونو او نور لارو چارو ګټه واخېستل شي .
۷ ـ د مهاجرينو د احوال د ثبت او معلوماتو لپاره بايد په پاکستان او ايران کې ثابت مرکزونه جوړ شي .
۸ ـ د نړيوالو معيارونو له مخې د تابعيت تذکرې يو واحد سېستم رامنځته شي او که امکان ولري سرشمېرنه اود تذکرووېش په يو وخت کې تر سره شي .
د لراوبر ويبپاڼي يادونه :
له ټولو درنو هيوادوالو هيله کوو چي د موضوع په اړه خپل نظر وليکي . ( د نورو لوستونکو تبصرې )
د افغانستان د کلتوري ودې ټولنې اعلامیه !
د سرشمیرنې د ځنډولو په اړه د وزیرانو شورا د پریکړې ملا تړ کوو !
د افغانستان د کلتوري ودې ټولنې اعلامیه !
د سرشمیرنې د ځنډولو په اړه د وزیرانو شورا د د پریکړې ملا تړ کوو !
د افغانستان د کلتوري ودې ټولنه ، دوزیرانو د شورا د 2008 کال د جون د میاشتې د دوهمې نیټې د هغې پریکړې ، چې دسر شمیرنې ( احصایې اخیستنې ) پروسه یې تر دوو کالو وځتډوله پوره احترام او ملاتړ کوي .
د حیرانتیا خبره خو دا وه ،چې په داسې شرایطو کې به دا سرشمیرنه یا احصایې اخیستنې څنګه تر سره شوي وای؟
په هر صورت،
د سرشمیرنې پروسه خو اوس موقتآ ، تر دوو کالو وځنډیده اما مشکلات او ستونزې لا پر ځای پاتې دی ،
او په دې هم پوهیږو ،چې ددې پروسې په موقتي ځنډولو کې هغو سیمینارونو ( ننګرهار، کندهار او د کابل د می دمیاشتې د 15 ) ، او په هیواد کې دننه او بهرکې، د بیلابیلو لیکنو او مقالو ، پوره اغیز درلوده .
البته د دې سیمیناونو جوړونکې ( د افغان کلتوري ټولنو جرګه ، هندارې کلتور ي او مطبوعاتي بنسټ ،د ويښ ځوانانو ټولنې ، د قومونو د ملي يووالي شورا او سولې ملي جرګې ،د پوهنتونونو درانو استادانو ، د ولسي ـ او د مشرانو جرګې درانو غړو او یو شمیر نورو درنو نا پیلو او آزادو کارپوهانو ، … ) په کې ونډه درلوده ،چې د افغانستان د کلتوري ودې ټولنه ددوی ټولو څخه د زړه له کومې مننه کوی او ددې ستر بري مباري ورته وایې ، دې ګډ کمپاین او ګډ کار دا واقیعت هم څرګند کړ ، که د هیواد دا بیلابیلې کلتوري ـ ، مدني ـ او فرهنګي ټولنې تل داسې په اتحاد او اتفاق وې ، د نړې هیڅ قوت به د دوی په لاره کې خنډ نه شی .
لکه څنګه چې چارواکې او درانه هیوادوال پوهیږی ، د سرشمیرنې د تر سره کولو په پروژې کې ، د امنیتې سونزو سربیره ډیرې نورې جدې ستونزې شته ، که چیرې حل نه شی ، دوه کاله وروسته به هم ، همدا حال وی ، ملت به ددوی په مخ کې ولاړ او خدای (ج) مه کړه په هیواد کې به جدې بحران رامنح ته شی . ددې دپاره وایو، چې تر مخه ددې چې ناوخته شی ، چارواکې دې لاس په کار شی .
زمونږ په اند :
1 – د سرشمیرنې په ادارې کې دې ډیر ژر اساسي او بنیادې ریفورم او سمونې تر سره شي .
2 ــ دا اداره ،چې اوس له بده مرغه سیاسي شوی ده ،ژر تر ژر دې په یوې متخصصې ، مستقلې ، بې پرې ، آزادې ، نا پیلې ادارې بدله شی ، او ډیر ژر دې ، ددې ادارې ترکیب د هیواد دواقیعتونو سره سم برابر شی .
3 ــ د سر شمیرنې د ادارې متخصصین دې ، د اړتیا سره سم ډیر کړی شي ، او دهیواد ګوټ ، ګوټ ( ولسواالېو او علاقه دارېو ) ته دې ولیږل شی ،همدارنګه د سرشمیرنې ولایتی ادارې دې په ټولو 34 ولایتونو ( ولسوالېو ، علاقه دارېو ) کې ، احیا او فعاله شي .
4 ــ د عامه پوهاوي د کمپاین چارې دې په ټول هیواد کې ډیر ژر پیل شي . خصوصا په هغو سیمو کې ،چې د زده کړې ستونزې شته ، خاص پروګرامونه طرح او تطبیق شی .
5ــ تر ټولو مهمه ، د شفافیت مسله ده. د احصایې مرکزي اداره دې داسي پروسیجر رامنځ ته کړي ، چې ټولو طرفونو ته د منلو وړ وی ، او په دې کار کې دې هغو هیوادو څخه کار واخلي ،چې افغانستان سره ګاونډیتوب ونلري .
6 ــ د ډبل چک یا کنترول ډیر غښتلې سیستم دې رامنځ ته شي ،چې د سرشمیرنې په ختمیدو کې ، دا ارقام سره پرتله کړې او د اړتیا په وخت کې د نهایې ارقامو د کنترول وړتیا ولري .
7 ــ د کوچیانو د دقیق شمیر معلومولو د پاره دې کره سیستم را منځ ته شی .
8 ــ د مهاجرو ستونزو ته دې خاصه پاملرنه وشي ، البته د هیواد دننه مهاجرو په هکله دې ، داسي سیستم جوړ شي ،چې ددې وګړو اصلي میشت ځای معلوم شي .
په بهر کې مهاجرو ته هم په خاصه توګه پاملرنه وشي خصوصآ په پاکستان او ایران کې .
9 ــ د ضریب د کارلو څخه دې په کلکه ډده وشی ، هڅه دې وشی ،چې د هیواد ګوټ ،ګوټ ته سرشمیرونکې ولیږل شي.
10 ــ د سرشمیرنې د چارو د ښه کنترول د پاره دې ، یو داسي آزاد ،مستقل ، بې پرې کمیسیون جوړ شی ، چې پوره واکمن وی او قطعآ سیاسي نه وی .
11 ــ همدارنکه دې سرشمیرنې پرځای دې پر یوه ډاډمن او اقتصادي الترناتیف ، په راتلونکې ، کې هم فکر وشی .
12 ــ د احصایې مرکزي اداره او د کورنیو چارو د وزارت د ثبت او د نفوسو د احوال ریاست دې سره یو شی ، تر ځو اداري بروکراسي هم کمه ، او دا چارې ښي پر مخ لاړي شي .
په درناوي
دافغانستان دکلتوري ودې ټولنې دې کار ډله
Germany Köln ، 05.06.2008