د ویسا خپلواکې ورځپاڼې د امریکا د بوسټن ګلوب ورځپاڼې د  یو رپورټ په نقل لیکلي دي چې په افغانستان روانه لانجه په یو ستراتیژیک مشارکت سره هواریدلې شي.

د ورځپاڼې په وینا تر هغو چې د افغانستان مهم ګاونډي هیوادونه د ګډې ګټې پر بنسټ د ثبات لپاره کار ونکړي په افغانستان کې د سولې چانس کم بریښي.

ورځپاڼې  په یو بل مطلب کې لیکلي دي چې د پاکستان ولس مشر اصف علي زردارې نن په یو رسمي سفر کابل ته راځي.

په ورځپاڼه کې په هلمند کې د روانو عملیاتو په اړه هم یو مطلب خبور شوې او لیکل شویدي چې  برطانوي ځواکونو په ناد علي ولسوالۍ کې د طالبانو څلور مهم ځایونه نیولي دي.

ورځپاڼې پخپله سرمقاله کې د جمهوري ریاست د راتلونکو انتخاباتو په اړه د مشرانو جرګې د ځینو غړو اندیښنه راغستې او هغه يې له بیلابیلو اړخونو څیړلې ده.

د هیواد دولتي ورځپاڼې پخپله سرمقاله کې د عاشورا په پاڅون تبصره کړې او هغه يې د ستر تاریخي ازمون ورځ بللې ده.

ورځپاڼې د خپل لومړي مخ په غټ سرلیک کې په هیواد کې د هوا او چاپیریال د ککړتیا په وړاندې روانو هڅو ته په اشارې لیکلي دي چې د ولس مشر کرزي په مشرۍ د چاپیریال ساتنې بیړنۍ کمیټه جوړه شوه.

ورخپاڼې په یو بل څیړنیز مطلب کې امنیت او بیارغونه تر  بحث لاندې  راوستلې او دا دواړه يې لازم او ملزوم بللې دي.

د ارادې خپلواکې ورځپاڼې د خپل لومړي مخ په غټ سرلیک کې د ملګرو ملتونو په حواله خبر ورکړې چې مرسته ورکوونکي هیوادونه په کابل کې غونډه کوي.

ورځپاڼې په یو بل مطلب کې په افغانستان کې د جمهوري ریاست د راتلونکو انتخاباتو په اړه په د هالنډ د یو څیړونکي په نقل لیکلي دي چې په افغانستان کې څوک د جمهوري ریاست وړتیا لري.

د ملي ارمان نا دولتي ورځپاڼې هم د مشرانو جرګې د غړو دې اندیښنو ته کتنه کړې او د هغوې په حواله يې لیکلي دي چې د غبرګولي په میاشت کې د انتخاباتو ترسره کول ناممکنه دي.

ورځپاڼې د خپل لومړي مخ په غټ سرلیک کې د ملي جبهې د  مشر  استاد رباني په حواله لیکلي دي چې دغه جبهه یو شمیر ځوانان فلسطین ته استوي.

په ورځپاڼه کې د زابل ولایت د  سناتور په حواله دا هم لیکل شویدي چې د حکومت او خلکو ترمنځ واټن د هرې ورځې په تیریدو سره زیاتیږي.

د اصلاح او انیس دولتي ورځپاڼو هم د افغانستان او سیمې په روانو حالباتو او پیښو خبرونه او تبصرې خپرې کړیدي.

انیس پخپله سرمقاله کې پاکستان ته د امریکا د بهرنیو چارو د وزات  د مرستیال  باوچر په سفر تبصره کړې.

خو اصلاح بیا پخپله سرمقاله کې دا غوښتنه کړې چې د عامې روغتیا وزارت د اصلاحي پروګرامونو ملاتړ باید وشي.

د هشت صبح نا دولتي ورځپاڼې  بیا د مشرانو جرګې  د غړو اعتراض د انتخاباتو د ځنډولو لپاره یوه توطعه بللې ده.

ورخپاڼې په یو بل مطلب کې د هوا د ککړیدو په اړه د ولس مشر  کرزي اندیښنو ته په اشارې له هغه غوښتې دي چې د ځمکې د ککړیدو چاره دې هم وکړي.

ورځپاڼې پخپله سرمقاله کې د عاشورا په پاڅون تبصره کړې او لیکلي دي چې دا د تاریخ په پاڼو کې د عدالت لپاره تر ټولو ستره نعره وه.