د ويسا پاڼي نه په مننی ،

 

اميد تميم

 

ويل کيږي چي  سبا (پنجشنبه د اپريل دېرشمه)  افغاني الاصله امريکايي زلمي خليل زاد  کابل ته رسيږي ترڅو نوموړی د جمهوري رياست د پاره د لسهاوو  کانديدانو په کتارکي  خپل نوم  هم  ثبت کړي  او په دې توګه ځانته « قانوني » يوه  د اوړو پزه کښيږدي .

 

لا د پخوا څخه داسي برېښېده چي  په امريکا کي د اوباما اداره د سخت دريزه جمهوري خواهانو تر فشار لاندي غواړي چي زلمی خليل زاد چي د امريکا د نيومحافظه کارانو د ډلي فعال غړی او د امريکا تر ټولو بدنامه او  د پخواني جمهور رئيس جورج بوش په ماجراجويه  اداره کي دهغه د ټيم يو لوړتبه غړی وو،  نوموړی به د افغانستان د جمهور رئيس په نامه   په افغانستان کي د امريکا راتلونکی وايسرا و ټاکي .

 

نن سبا زيات سياسي کارپوهان په دې خبره سلا دي چي کابل ته د  ملګرو ملتو په سازمان کي د امريکا د پخوانی سفير خليلزاد راتګ به هغه سياسي زد وبندونه چي دافغانستان دانتخاباتو لپاره هم د حکومت په دننه او هم د حکومت په  دباندي کړيو کي تر  لاس لاندي دي هغه به  ګډوډ کړي او په عوض کي به   خليلزاد خپل د پردې ترشا امريکايي ټيم چي څه موده مخکي يې په ډوبی کي را غونډ کړي او په هغه کي  نوموړي  خپله محرمانه امريکايي اجنډا ورته توضيح کړېوه ، را بر سيره کړي  .

 

داسي معلوميږي چي په دې  انتخاباتو کي به د خليلزاد حضور  په واقعيت کي  د امريکا د هغه سناريو عملي کېدل وي چي امريکا لا د پخوا څخه زموږ د هيواد او  سيمي  د کړکېچ د لا بحراني کېدودپاره   تر لاس لاندي  نيولی وو . خو دلته چي  د انتخاباتو په نامه کومه دغه لويه هنګامه او لوبه را  روانه ده  اوهغه  دوه نيم سوه ميلونه ډالر چي پر هغه باندي زموږ د ملت په نامه او هغه هم د انتخاباتو د پاره لګيږي نو دا په رشتيا د امريکا د هغه ريشخند ډيموکراسۍ يوه مضحکه ډرامه ده چي د نړۍ والو و نندارې ته  را ايستل کيږي   .