دافغانستان دولسمشر حامد کرزي دفرمان له مخې سر له سبا به په ټول افغانستان او له افغانستان باندې په سیاسي استازېیو کې دافغانستان بیرغ دپاکستان دپخوانۍ لومړۍ وزیری په خاطر دڅلورویشتو ساعتونو په ترڅ کې نیمه ځوړنده وي.

دولسمشرۍ ماڼۍ درسنیو ددفتر له لوري لراوبر ویبپاڼې ته په راغلې خبرپاڼه کې لیکل شوي چې دپخوانۍ صدراعظمې او دخلکو دګوند دمشرې میرمن بې نظیر بوټو دشهادت او دپاکستان ددوست اوورور هېواد له خلکو سره په دغه ستره غمیزه کې دغمشریکۍ او خواخوږۍ پخاطر سر له سبا دشنبې دورځې دسهار له اتو بجو او دیرش دقیقو څخه تر ۲۴ ساعتونو پورې به دافغانستان ملي بیرغ په ټول هېواد او په بهرنیو هېوادونو کې دافغانستان په سفارت خونو او دیپلو ماتیکو نماینده ګیو کې نیم ځوړند وي.

میرمن بې نظیر بوټو پرون مازیګر دپاکستان دراول پینډۍ په ښارکې دیو تروریستي برید په ترڅ کې شهیده شوه. حامد کرزي، بې نظیر بوټو دپاکستان او اسلامي نړۍ زړوره لور وبلله، وې ویل چې هغې دډموکراسۍ، پرمختګ او دپاکستان دسوکالۍ پخاطر خپل ژوند له لاسه ورکړ. ولسمشر، دمیرمن بوټو مړینه پاکستان او اسلامي نړۍ ته ستره ضایعه وبلله.