۱۳
درهتاس دراجه  هرکشن  د شهزادګۍ ګنګا د تر لاسه کولو دد ریمی  مقابلې  دګټولو وروسته  هغه نقاب پوشه  ځوان   خپل  آس  د شرق  په  لور  ځغلاوه  خو شهزاګۍ ګنګا هم دخپل  پلار د  ساتونکو دډلې  یو ساتونکې دهغې په تعقیب  پسې  روا کړې .  هغه هم  په لږ واټن کې دهغه نقاب  پوش  پسې  روان و .ترڅو هغه  وپوهیږي  چې  دا نقاب پوش   څوک  دې او  دکومه ځایه  راغلې  دې.
هغه  اجنبی نقاب پوش  خپل  اس   په  ګړندۍ توګه  ځغلاوه،   اوس هغه د رهتاس  څخه نزدې  اته میله  لرې   ورانو  ویجاړو ته  رسیدلې و . هلته  د ونو د ځنګلو څخه  نا څاپه   درې  نښه  ویشتونکې  او جنګجویان  را ووتل ، او دهغه  لاره یی و نیوله . دغه نقاب پوش  هم دهغو د کتلوسره  سم    په یوه ټکان سره   دخپل آس  واګې    کش کړې   او ویی دراوه .
بیا دې اجنبی  نقاب پوشه  د هغو لاره  نیوکونکو  لورې ته  ورغې  ویی کتل  چې  هغوې  درې واړه  ، یو د راې سین  شهزاده  سانول  داس  ، بل  د میواړ  شهزاده  سورج مل  او دریم هم د کالنجر شهزاده  سورداس  دې . بیا  د راې سین  دراجه  زوې  سانول  داس   خپل  اس  لږ  را مخته کړ  او دغه نقاب پوش ته  یی  وویل :
ګوره اجنبی  !  مونږ نه پوهیږو   چې ته  څوک  یی  ، اود کوم ځایه  راغلې  یی .   خو تا د هرتاس  د راجه هرکشن  د  لور  شهزادګۍ   ګنګا  د ترلاسه کولو دریمی   مقابلې  وګټلې   او مونږ درې  واړه شهزادګان  دې مغلوبه کړو .، زمونږ لورې ته لږ څه په غور سره ووینه ،  زه  دراې سین  شهزاده  سانول داس  یم ،  زما سره  څنګ  کې د میواړ  شهزاده  سورج مل  او د کالنجر  شهزاده  سورداس  دي . مونږ درې واړه دلته په دې   ورانو ویجاړو کې  ستا لاره نیولې ده  تر څو  مونږ تاته  زمونږ ددې بې  عزتۍ  په  را رسیدو سره سزا درکړو.
دهغوې په دې  خبره دغه نقاب   پوشه ترې   په ډیره   یخه  ټنډه او   نرمې ژبې  سره    و پوښتل   چې  نه  خو زما او ستاسو  دتر منځ کومه دښمنې شته  او نه کوم عداوت ،    چې تاسې درې  واړو  زما لاره نیولې  ده  اوزما د وژلو نیت موکړې . دا ځل  د میواړ  شهزاده  سورج مل  ورته  په ځواب کې وویل :
ګوره اجنبي !  تا  د هرکشن د شهزادګۍ  د تر لاسه کولو  دریمه مقابله  هم  ګټلې  او مونږ درې واړه دې نه یواځې  مغلوب کړي یو  بلکه مونږ درې واړو ته دې بې عزتي  راوړې ده .  په دې اساس مونږ درې واړه له تا څخه  دخپلې  بې عزتۍ   بدله اخلو .  دغه نقاب پوش   یو ځل  بیا په ډیرې نرمۍ سره  دوې  درې وا و   ته وویل :
زما لاره  نیونکو  واورئ ! زه  تاسو  درې واړو شهزادګانو ته   ګواښ  کوم   چې زما  لاره  پریږدئ  ، زه نه غواړم  له   تاسې  سره  ټکر وکړم . او نه  غواړم   بې  دلیله له تاسې   سره په جنګ  کې  را و نغاړم ، یو خبره  په غور سره واورئ  ، که چیرې  تاسې د  شهزادګۍ  ګنګا  دترلاسه کولو دغه درې واړه   مقابلې  له ما څخه و نه ګټلاې  شوې  نوبیا  په دې ویرانو کې به زما سره   څه ډول مقابله وکړئ؟
دهغه په دې خبره دا ځل د میواړ  شهزاده  سورج مل   ورته  په ځواب  کې وویل :
واوره  اجنبی !  دمقابلو ګټل  یوه خبره ده  او  په دې ویرانو کې زمونږ  د دریواړو  سره  ستا  دټکر  خبره  بیله  ده . مونږ درې واړه  به  په تا  یو ځاې  حمله وکړو   او ستا وجود  به ټوټه ټوټه کړو  . ته خو مونږ ته  کوم  کمذاته  هندو  ښکارې . او په همدې خاطر مجبور شوې یی  چې  خپل مخ اوڅیره  پټه و ساتې . که  چیرې ته  دکوم  اعلې  ذات  هندو  وایی  او یا دکوم ریاست   شهزاده  ، نوبیا  به دې  داسې خپل مخ  او څیره  په نقابو کې  نه را نغاړله . او نه  به دې په پټه خوله  دې  مقابلو کې برخه اخستله  بلکه  زمونږ په څیر  به دې په ښکاره مخ اوڅرګنده  توګه په دې مقابلو کې  برخه اخستلې واې .  پخوا له  دې  چې مونږ درې  واړه له  تا  څخه د خپل عزت  دبدلې د اخستلو له پاره پرتا  خپلې  تورې  را  سپرې کړو  نو ووایه  چې ته څوک  یی ؟  دهغوې په دې  خبره دغه نقاب  اغوستونکې  په ډیر قهر  سره وویل :
   درې واړه   بې غیرته   شهزادګانو ! واورئ !  که چیرې  زه ستاسې د دې  پوښتنو ځواب  درنه  کړم  نو  بیا  به ستاسې  عکس العمل  څه  ډول  وي؟ په ځواب  کې یی دا ځل د رای سین  شهزاده  سانول  داس  را مخته شو  او ورته یی وویل :
 واوره  اجنبي ! هغه  څه  چې در څخه پوښتل شوي دی  که چیرې د هغې ځواب  دې  را نه کړ  نو بیا  به ته ووینی   چې  مونږ پر تا  د شاتو د مچیو ، د پاګلو هواود  تنکي ځوانانو او په غرنو کې  د ورکو  شویو  لیوانو په څیر    یرغل در وړو . ستا  جسم   به  ټوټې  ټوټې  کړو.  ای  اجنبی  ! په دې غرونو کې  به مونږ تا  بوټې  بوټی  دمرغانو  دخوراک کړو  خو د هر څه دمخه  درته وایو  چې خپل نوم دې  را وښیه ، خپل وطن او ځاې  ځیګې  ته را څرګند کړه  ، ته ولې  خپل نوم  پټوې  ، ولې د خپله  مخه   نقاب   نه لرې کوې . دهغوې په دې خبرو  باندې دا  اجنبي نور  هم  و غرید  او دپخوا  څخه یی  نور هم سخت  ځواب ورکړ .
واورئ  اې  ذلیله  انسانانو ! تاسې  درې واړه  ذلیله  شهزادګان   یواځې  وخت  لرئ  ، چې زه  تر درې  پورې  شمیرم  ، که چیرې هغه وخت مو هم زما لاره  پرینښوده ، نوبیا یادساتئ  چې  زه به تاسې درې  واړه  په همدې  ورانو ویجاړو  کې  د خسو  خاشاکو په څیر و سوزوم . واورئ   !  اوس  هم وخت  لرئ  چې زما لاره  پریږدئ  او  که نه زه  به ستاسې پر خلاف انقلابي  قدم واخلم .
په همدې وخت  کې  د رهتاس   راجه هرکشن  هغه   ساتونکې  چې  شهزادګۍ  ګنګا  ددې نقاب  پوش  دتعقیب  له پاره دهغه پسې  استولې  و ،  هم  دغه  ځاې ته  ورسید . هغه  همغسې  خپل  واټن  لږ  څه لرې  ساته ،  د نقاب پوشه  او  ددری  کسو شهزادګانو  تر منځ  د ترخو  خبرو  په وخت کې دغه ساتونکې هم هلته  د ونو په  ګڼه ګوڼه کې  پټ  کیناست ، او  حالات   یی څارل  چې  څه پیښیږی . دهغې  وروسته د کالنجر شهزاده   سورداس  را مخته شو  او ددې اجنبی خبرو ته  یی ځواب  وایه ، سورداس  هم  دغه نقاب  پوش ته وویل  چې  ګوره  اجنبی ! داسې  څرګندیږی  چې تا  زمونږ په لاسو د مرګ  له پاره  ځان تیار کړې دې . که چیرې  ستا اراده همداسې وي  نوبیا   همداسې سهی ده .  په همدې وخت کې  دغو درې واړو  شهزادګانو  د کوم عکس العمل  د ښوولو له پاره ځانونه   جوړول  چې یو ناڅاپه  دغه  اجنبی  نقاب  پوشه   په حرکت  راغې  اودخپلو  کالیو  څخه  یی  یو  دروند خیجر  را وویست  او د راې سین  دشهزاده  سانول داس  په سینه کې یی ورښخ کړ  او دهغه کار یی ور تمام کړ .
سانول  داس د  زخمی کیدو نه وروسته دخپله آسه   را پریوت  ، دهغه په  زخمی کیدو  باندې  د نورو  دواړو  شهزادګانو   سورداس او  سورج مل  اندیښنې نورې  هم زیاتې  شوې . په همدې وخت کې همدې اجنبی نقاب  پوش   خپل  اس ته  یو پونده  ورکړه  اوتوره  یی  را وویسته  او یوځل بیا یی په دوې  حمله وکړه ، د میواړ  شهزاده  سورج مل  یوې  لورې ته کوږ  شو  خو د کالنجر د شهزاده   سورداس    څټ  یی  دخپلې تورې په  دې ګذار  سره  پرې کړ .
دخپلو دوو ملګرو د مرګ وروسته د میواړ  شهزاده   سورج داس  په اس  پښه  واړوله  ، او د هغه ځایه د تښتیدو  هڅه یی وکړه  ،ځکه هغه  پوه شوې و  چې دا ډیر خطرناکه  نقاب پوش  دې  اوشونې  ده  چې  حالت  یی ددوو نورو ملګرو په څیر  شي . خو اوس  ددې نقاب  پوش  څخه تیښته  څه اسانه کار  نه و . څه وخت  چې  د میواړ  شهزاده  خپل  آس  ته پونده ورکړه  او  په  تیښته شو نواجنبی  هم دهغه  پسې  تر شا  په خپل آس  باندې  سپور  ور  وځغلید.
دغه  نقاب  پوش  د میواړ  شهزاده  تر ډیره لرې  پورې  تښتیدو ته پری  نه ښود . اوپه هغه  باندې  د تورې  د یوه ګذار  سره  ، دهغه  تنه  د سر نه  تر پښو  پورې   دوه  ځایه  شوه .  دغه اجنبی  نقاب  پوشه   په ډیر  لږ وخت کې   درې واړه  شهزادګان دخپلې  مخې څخه  لرې کړل  ،بیا یی خپل  آس  په ډیره ګړندۍ توګه بیرته  را ستون کړ او د  ونو  دغې  ګڼې ګوڼی  ته،  چیرې  چې  د شهزادګۍ  ګنګا  ذرې   ورته  پټ  ناست و ،  راغې .
دلته د رادسیدو سره  سم  دغه  اجنبی  خپل آس  و دراوه   ،  دخپل  شا څخه یی کمان  را  پرانست  ، غشې  یی په  کې کیښود  اوبیا  په یوه  لوړ  ځاې  وخوت ، اوبیا یی په لوړ اواز  سره  په دې ګڼه  ګوڼه کې پټ ناست کس  ته  ور غږ  کړ او ورته  یی وویل :
اې  په دې  ګڼه ګوڼه کې ناست  اجنبی !  زه نه پوهیږم  چې  ته څوک  یی ، او نوم  دې څه دې ؟ اود څه له پاره دلته  پټ ناست  یی . زه  تاته  حکم کوم چې سمدستې ددې  ګڼې ګوڼی  څخه را ووځه ،او که نه یاد ساته  چې زه تر ډیره  پورې  انتظار نه شم کولې اوپه  تا باندې  به غشي  و وروم . ته به ما پیژنې   ، خو ته  دا هم واوره   چې زما نښه  نه  خطا کیږي او زما  لمړې  غشي  دزړه  په سر و ر نښلي. ددې نقاب  پوشه  دغه  ګواښ  ډیر  اغیزمن  ثابت شو . ځکه  هغه  سپور د ونو د ځنګل  څخه  را ووت . نقاب  پوش  هم ددغه اجنبی  څنګ ته راغې   او  ودرید. په دې وخت کې نقاب  پوش  خپل کمان  بیرته په  شا  و تاړه ، غشې یی ترې وویست . خپله توره  یی په لاس کې واخسته ، په بل لاس کې  یی ډال  و نیو ، بیا یی دهغه څخه وپوښتل   او ورته  یی وویل   چې  ووایه  !  ته څوک  یی؟  او د ونو په دې ځنګل  کې ولې پټ  شوې  وې ؟ په دې وخت کې دغه تعقیب  کونکې ورته په لړزیدلی  اواز  سره  وویل :
ته  د هر څه دمخه  له ماسره ژمنه وکړه  چې که زه  رښتیا ووایم نو ته به   راته بښنه وکړې . دهغه په ځواب کې نقاب  پوش  ورته وویل : وایه ته  څه ویل غواړې  ، که چیرې تا رښتیا وویل  نوزه  درته هیڅ  هم نه وایم ، دهغه په ډاډ  دغه  تعقیب  کونکې ورته وویل :
زه د رهتاس  د راجه  هرکشن  د ساتونکو دډلې څخه  یم . څرنګه چې تا د  شهزادګۍ  ګنګا  سوئمبر  ګټلې  دې  ، خو د رواج او کلتور  مطابق  تا د  سويمبر د ګټلو وروسته د  شهزادګۍ ګنګا سره  خبرې  هم و نه کړې  او تر څنګ  یی دخپل نوم اونښې د ښوولو  پرته دهغه ځایه  ولاړې  نو شهزادګۍ  ماته  ستا  د تعقیب کولو  امر وکړ . تر څو  زه هغې ته معلومات  یوسم  چې ته څوک  یی  ،ا ود کومه ځایه راغلې یی  اودکوم  ریاست  اوسیدونکې یی . ددې اجنبی تعقیب  کونکې  د ځواب  په اوریدو سره هغه نقاب  پوشه د لږ وخت  له پاره  خاموشه ولاړ و ، دهغه دحالت  څخه څرګندیده  چې هغه  مسکې مسکې کیږي ، بیا هغه  وویل :  چې په رښتیا  چې  تا  سهی  خبره کړې ده . ګوره  ! هغه درې  شهزادګانو د شهزادګۍ  ګنګا    دسويمبر په مقابلو کې ګډون کړې و  ،نو هغوې  په دې ورانو ویجاړو کې  زما لاره  نیولې وه . هغوې  په دې  خفه  و  چې ما هغوې نه دې پری ایښې  چې دشهزادګۍګنګا   سويمبر وګټی . نوپه دې اساس  هغوې غوښتل ما ووژنی . خو تا وکتل  چې ما دهغوې  درې واړو کار  ور تمام کړ . دهغه په دې خبره  هغه  تعقیب کونکی وویل  چې ما ټول  هر څه په  خپلو سترګو وکتل .  هغوې  په رښتیا هم ددې وړ  وو  چې  ووژل شی . دهغه  په دې خبره نقاب پوشه  ورته  وویل :  ګوره  ! ددې  مړو  شوو درې  واړو  شهزادګانو اسونه  له خپله ځانه سره  یوسه ، او ددې ځایه بیرته  ستون  شه ، خو که  چیرې  بیا دې  زما  تر شا د راتللو هلې ځلې وکړې  نو یاد ساته  چې دهغو  شهزادګانو په څیر  به  ستا  څټ  هم له تنې  پرې کړم . اوس  له ځانه سره دا اسونه واخله او له دې ځایه ورک شه .
ددې نقاب  پوش  په  ګواښ  باندې  هغه تعقیب  کونکی     ددرې واړو  وژل  شوو  شهزادګانو  اسونه  له ځانه  سره واخستل اوپه  ډیره  بیړه  بیرته ستون  شو . خو هغه نقاب پوش  هملته ولاړ او  د تعقیب  کونکې په لور یی  د هغه تر شا کتل .  ان  تر دې چې  هغه د هغې د  سترګو  څخه   ورک  شو. بیا یی په خپل  اس  پښه واړوله اوپونده  یی ورکړه  او دجنوب  شرق  په لور  یی  په  ګړندۍ توګه  خپل سفر پیل کړ.
 درهتاس  راجه هرکشن دخپلې لور شهزادګۍ  ګنګاا و د خپلو نورو  رانیانو سره  په  خپل محل کې  په خبرو  بوخت و . په همدې وخت کې د ساتونکو د ډلې  مشر  دهغه  ځاې ته  راننوت  او راجه هرکشن ته یی وویل  چې  :  هغه  ساتونکې  چې  شهزادګۍ  ګنګا د  هغه  نقاب  پوش  د تعقیب  پسې  استولې   و  هغه  هم بیرته  راستون  شوې  او غواړی  دشهزادګۍ  سره  ووینی . د  ساتونکې دډلې  د مشر ددې خبرې سره سم شهزادګۍ  ګنګا   دخپله ځایه ټوپ کړ  او را پورته شوه ، راجه هم  دخپله ځایه راپورته  شو  او ویی ویل   مونږ  دواړه  پلار اولور  به دهغه  سره خبره وکړو .   ددې خبرې  سره  سم  شهزادګۍ او پلار  یی  دواړه دهغې  خونې څخه بیرون   را ووتل .
هغه ساتونکې  په لږ واټن کې خپل  اس د  واګو نیولې و او ولاړ  و . دهغه  شاته   دهغو مړو  شوو  شهزادګانو  درې واړه  آسونه  هم  و  ، شهزادګۍ هغه ته  را نژدې  شوه او په ډیره  بې  قرارۍ  سره یی و رڅخه و پوښتل :  ایا دهغه نقاب پوش  تعقیب  دې وکړ ، هغه څوک  و او دکومه ځایه راغلې و  او  اوس  چیرې ولاړ. دهغې په دې خبرو  هغه ساتونکې  خپل  سر ټیټ  اچولې  و او  غلې ولاړ  و  بیایی  شهزادګۍ  ته  وویل :  زه  ډیر افسوس کوم  چې ما  هغه  تر اخره  پورې تعقیب نه شو کړاې . دهغه  په دې خبره ترې  شهزادګۍ  په ډیره  حیرانتیا  سره و پوښتل  چې ولې  دې  دهغه   تعقیب  و نه شو کړاې ؟ هغه  ساتونکې  ورته په ځواب کې وویل :
شهزادګۍ  ! ما دهغه نقاب  پوشه  تعقیب  تر ډیره  ځایه وکړ  ، ان ددې ځایه   اته  یا لس میله  لرې واټن کې پسې ولاړم .   هغه وخت  چې دې نقاب پوش  د  شر ق  په  لورې  خپل  آس  ځغلاوه   زه  هم ورپسې روان وم . خو  هلته د ونو د ځنګل  څخه  یو ناڅاپه  ستا په سویمبر کې برخه اخستونکې  درې  شهزادګان هریو  د راې سن  شهزاده  سانول داس ، د میواړ  شهزاده   سورج مل  او د کالنجر شهزاده  سورداس   را پیدا  شول  اودهغه  اجنبی  نقاب  پوشه  لاره  یی ونیوله .
تر دې  ځایه  ما تعقب  وکړاې شو  اوهلته په رسیدو سره   په ونو کې  پټ کیناستم  او ددې ټول  منظر  ننداره  مې کوله ، کله چې دې نقاب پوش  ددې  درې واړو  شهزادګانو  څخه د خپلې  لارې د بندولو  پوښتنه وکړه   نو هغوې  ورته په ځواب کې وویل  چې  څرنګه  چې دوې  درې واړو ددې نقاب پوش  له لاسه   د شهزادګۍ  سویمبر نه دې ګټلې ، او د دې   شتون  ددوې  له پاره دماتې  اوشرمیدلو  سبب ګرځیدلې دې  نوپه دې خاطر به اوس  هغوې  دا نقاب  پوش  ژوندې نه پریږدې .  هغوې  درې واړو   ددې  اجنبی  څخه دهغه د نوم او ځاې په اړه وپوښتل   خو هغه ورته  هیڅ  ځواب  ور نه کړ  خوکله چې  دغه  درې واړه  شهزادګان  په دې  نقاب پوش  باندې   را پریوتل  نو شهزادګۍ  !  هغه  اجنبی  یو انقلاب   را منځته کړ .
هغه ډیر  زیات  تیز  ، ډیر  چالاکه  او ښه  ماهر تیغ  وهونکې دې ،  هغه د سترګو په رپ کې  دراې سین  شهزاده  سانول داس   په خپل  خنجر باندې  وواهه   اود آسه یی لاندې  را وغورځاوه ، کله  چې هغو نورو دواړو  شهزادګانو  دخپل  ملګر ې حالت  ته  کتل   اود څه  تصمیم  نیولو هوډ یی کاوه   چې په دې وخت کې  هغه نقاب پوشه  خپل  آس  ته  پونده ورکړه  او د کالنجر شهزاده   سورداس  یی  را چپه کړ . دمیواړ  شهزاده   سورج مل  چې کله  دا حال وکوت  نو د تیښتې  لاره یی خپله کړه   خو  نقاب  پوش هغه   تعقیب  کړ او  د شا  له اړخه  یی په توره  داسې  وواهه  چې وجود  یی دوه  ټوټې  شو  اوهملته  له منځه ولاړ. او په دې توګه  یی دهغوې درې واړو  شهزادګانو  ژوند ته  د پاې  ټکې  کیښود.
دا زما بدقسمتی وه چې هغه نقاب پوش   زه دونو په دې  ځنګل کې  کتلې وم ، نو هغه بیا زما لورې ته راغې ،خپل کمان  یی را وویست او  غشې  یی په کې کیښود اوماته  یی   ګواښ وکړ  چې  زه د ځنګله   څخه را ووځم   او که نه ما به دخپلو غشو  نښه کړي . ما د هغه  نښه  ویشتل  هلته  ستا په سویمبر کې  کتلي وو  چې هغه خطا  نه ځی  نوپه دې خاطر  زه  غلې  شانته  د هغه  پټنځاې  څخه را ووتلم .
کله چې هغه  زما  څخه د تعقیب  کولو علت  و پوښت  ، نو ما ورته  رښتیا  رښتیا وویل ، چې  زه  شهزادګۍ ګنګا ستا  په تعقیب  پسې  را  استولې  وم . تر څو هغې ته خبر  یوسم   چې ستا نوم  څه دې ، ته دکومه  ځایه  راغلې  یی  او کوم هیواد  یاریاست  اوسیدونکې یی ؟  کیدې  شې هغه  زما په رښتیا ویلو  باندې خوشحاله شوې وې  نو ماته یی حکم وکړ  چې د مړو  شوو  درې واړو  شهزادګانو  دا  آسونه له ځانه سره یوسم  اوبیرته ستون  شم . نو ما دهغې  خبره و منله  او دادې  بیرته  ستاسې  حضور ته راغلم . اودغه  درې اسونه  چې  زما تر څنګ  ولاړ  دي   دا دهغو  درې واړو  شهزادګانو  اسونه  دي . نو شهزادګۍ  ما همدومره  ویل  غوښتل  چې ومی ویل :
تر دې  ځایه دخبرو  وروسته  هغه تعقیبونکې  ساتونکې  خاموشه  شو ،بیا شهزادګۍ  هلته  ډیره  ناهیلې  او اندیښمنه  و دریده ، تر لږه   وخته  پورې  یی ځان  سنبال کړ اوهغه  تعقیب  کونکې  عسکر ته   یی وویل : ته اوس   ولاړ  شه او  ارام  وکړه  ،  اندیښمن کیږه  مه ، هغه کار  چې تا ته در سپارل  شوې  و هغه دې  ترسره  کړې دې . د شهزادګۍ  ددې عکس العمل  دکتلو وروسته هغه  ساتونکې  په  ډیره خوشحالۍ سره دهغه ځایه  ولاړ  . دهغه د تللو وروسته شهزادګۍ  ګنګا د خپل  پلار  راجه  هرکشن   په لورې  ورغله   اوورته یی وویل :
پلار جانه ! هیڅ  خبر نه شو  چې دا نقاب  پوشه  څه ډول  انسان و . هغه ډیر ښه  تیغ وهونکې ،  او بې جوابه  غشي  ویشتونکې دې  ، هغه  زما سویمبر هم وګټه  او ماته  یی کوم  اهمیت  هم  را نه کړ . اودتللو په وخت کې  یی همدومره  وویل چې  زه  تا نه خوښوم. پلار جانه  !  د ا  به څه  ډول  انسان وي  چې  خپل ځان  ته  دومره ارزښت ورکوي  اودخپل ځان  په مقابله کې ما دومره بې  ارزښته ګڼی . پلارجانه !  زه په دې اړه هسې  لاس  په لاس  نه شم  کیناستلې ،  زه به  په هره  توګه  چې وې دا  ډاګیزه کوم  چې دا نقاب پوشه   څوک دې ؟ ماته  یاد دی  چې زما د سویمبر  ددویمو مقابلو په ورځ  د کوچیانو دقبیلې مشر  فدایی خان  دهغه  سره دخبرو  له پاره دلته راغلې و .
پلار جانه !  ته ماته د فداېې خان   اته  پتّه   معلومه کړه . اوهغه ماته  را  ولیږه  تر څو دهغه  څخه و پوښتم  چې   په مخ  اوڅیره  باندې نقاب  اغوستونکې   دغه  ځوان  چې زما  سویمبر  یی هم ګټلې دې  څوک  دې . پلارجانه !  څرنګه چې  هغه درې  ځلې  زما دتر لاسه کولو  مقابلې  په ښه شان سره ګټلې دي ،  په دې اساس  زه  به  په هر صورت دهغه د تر لاسه کولو  هڅې  کوم . هسې خو  رواج  او رسوم دادی  چې  شهزادګان   تل شهزادګۍ  ځانته  پیداکوی، خو زما په اړه  دا ټوله  خبره  بلمنګه   ښکاري ، زما دسویمبر د ګټلو نه وروسته  هغه  زما  څخه   خپله ناخوښي  څرګنده کړې ده  خو اوس  به زه دخپل  ضد  په واسطه   هغه  پری نږدم . زه  به  په  هره  توګه  چې شونې   وی   هغه  پیدا کوم  اودخپل  ژوند ملګرې  به یی ګرځوم .
تر دې ځایه دخبرو وروسته  شهزادګۍ  ګنګا  خاموشه  شوه ، راجه  هرکشن  په ډیره  نرمۍ اومحبت   ورته وویلې  ،ګوره  لورجانې ! ته په دې اړه   اندیښنه مه کوه  او مه  ناهیلې کیږه ، زه  به  دهمدا اوسه د  کوچیانو دقبیلې دسردار  فدایی خان  په لټه کې شم  ، که هغه زما لاسته  راغې نو زه به یی ستا تر مخه  حاضر کړم . ته به دهغه  څخه  وپوښتې  چې  ستا د لاسته  راوړو  د مقابلو دغه نقاب  پوشه ځوان  څوک  دې ؟ د خپل  پلار  راجه هرکشن  دځواب  په اوریدو  سره   شهزادګۍ   ډیره  خوشحاله  شوه  ، اوبیرته  دواړه پلار اولور دمحل  په لور  روان  شول  اوهمغه ځاې ته ورغلل  چیرې  چې پخوا ناست و.
پرلپسې لري ……