لراوبر ویب پاڼه لراوبر يو افغان – تازه خبرونه
د امريکا د متحده ايالاتو د پوځي اډو په اړه د رحمان بابا نظر او وړاندوينه (احمد نجيب بياباني)
چې په زور ور سره نه ئې برابر
د هغو تر څنګه مه کښېنه زړه ور
زورآور اور و اوبه دي فهم وکړه
چې ډوب نه شې يا و نه سيخې بشر
زندګي که بې اوبو بې اوره نه شي
تل هم نه دي هېچا ايښي په ټټر
خدای ور مه وله سېلاب د چا په خونه
که په قطع هم اوبه وي د کوثر
و دې نه لګېږي اور په کور د هېچا
که رڼا يې وي د شمس و د قمر
چې يې درست صورت غلبېل شي په اغزېو
وخوړ مه شه د هغې ونې ثمر
د هغه دېوال په سيوري څوک کښې مه نه
چې ولاړ وي لکه زوړند چاود کمر
چې په ګېډه دې څو خېژي مخ يې ورک شه
که د سرو زرو چاړه وي يا خنجر
ناکرده سودونه ډېر دي په چهان کې
سود هغه دی چې د خير وي نه د شر
و اوبو ته اچاوه نه شي ځان خوږ دی
ګنې ډېر دي په درياب کې دُر ګوهر
چې له آب و له حُرمته سره نه وي
خدای ور مه کړه و چا هسې سيم و زر
زورآور که رسوي و چا ته فيض
له دې فيضه سره وګڼه ضرر
په يارۍ د زورآور و غلط مه شه
مګر دا چې تر ده ته يې زورآور
په هر وخت چې ته غالب و دی مغلوب وي
ترو هاله يې قدمونه ږده پر سر
يا خو دا چې ته قدم يې په در نه ږدې
دغه پس يې ځان وګڼه پدر
چې هنرګڼي ياري د زورآورو
زه رحمان کومه بول په دا هُنر
