لراوبر ویب پاڼه لراوبر يو افغان – تازه خبرونه
کابل ، ۷ ثور ۱۳۹۰
په خيبر پښتونخوا کې دافغانستان د زونونو ترمنځ د پیل شویو سیالیو په لړ کې د آمو لوبډلې بست ته ماتې ورکړه او د نولس کلنو ځوانانو لوبډلې له سپین غر لوبډلې سره خپله لوبه مساوي کړه.
دغه درې ورځنۍ سیالۍ د افغانستان کرکټ بورډ په نوښت د لوبغاړو د وړتیاوو لوړولو او تجربو زیاتولو په موخه په لاره اچول شوې چې پکې د نولس کلنو د لوبډلې ترڅنګ د هیواد د پنځو زونونو (بست، امو، مس عینک، سپین اغر او بند امیر) لوبډلې ګډون کوي.
ددې سیالیو په لړ کې د پيښور په ارباب نیاز سټیډیوم کې د نولس کلنو لوبډلې او سپین غر لوبډلې ترمنڅ درې ورځنۍ سیالي نن مساوي پای ته ورسیده.
ددې لوبې پچه د نولس کلنو لوبډلې کپتان وګټله او لومړۍ یې پخپله بیټنګ وکړ، د غه لوبډلې ددې لوبې په لومړي وار (اننګز) کې په ۷۲ اورونو کې د لسو لوبغاړو په سوځېدو ۳۶۱ منډې جوړې کړې، د نولس کلنو لوبډلې له لوري جاوید احمدي ډیره ښه لوبه وکړه او ۱۳۸ منډې یې جوړې کړې، دغه راز محب الله هم و کولی شو چې ۵۲ منډې جوړې کړي.
د سپین غر لوبډلې له لوري سمیع الله شینواري ۶ لوبغاړي وسوځول.
د سپین غر لوبډلې پخپل لومړي وار کې په ۹۳ اورونو کې دلسو لوبغاړو په سوځیدو ۴۲۱ منډې جوړې کړې، د هیواد د ملي لوبډلې لوبغاړي کریم صادق ۱۵۲ ، ضمیر ۸۱ او سمیع الله شینواري ۵۳ منډې جوړې کړې، د نولس کلنو له لوري یمین ۵ او رشید ۳ سیال لوبغاړي وسوځول.
د نولس کلنو لوبډلې پخپل دویم وار (اننګز) کې په ۷۷ اورونو کې د ۶ لوبغاړو په سوځیدو ۳۲۴ منډې جوړې کړې، له دوی څخه ناصر جمال چې د ملی لوبډلې د پخواني کپتان رییس احمدزي ورور دی، ۱۶۳ منډې جوړې کړې، د سپین غر له لوري حمید حسن ۲ او ضمیر ۳ لوبغاړي وسوځول.
چونکه د نولس کلنو لوبډله پخپل لومړي وار کې د ۶۰ منډو له زیان سره مخ شوی و، نو د سپین غر لوبډلې ته یې د ۲۶۶ منډو هف وټاکه، خو ددریمې ورځې تر پایه پورې د سپین غر لوبډلې وکولی شوه چې د ۶ لوبغاړو په سوځیدو ۱۵۴ منډې جوړې کړي او دغه راز دا لوبه مساوي پای ته ورسیده.
افتاب عالم د سپین غر ۶ لوبغاړی وسوځول.
ددې سیالیو په بله لوبه کې چې د پيښور ښار په جمخانه لوبغالي کې ترسره شوه، د امو لوبډلې د بست لوبډلې ته ماتې ورکړه.
د بست لوبډلې ټاس وګټله او لومړی یې پخپله بیټنګ وکړ، دوی په ۶۱ اورونو کې د لسو لوبغاړو په سوځیدو ۱۸۶ منډې جوړې کړې، شبيرنوري ۷۴ منډو سره ښه لوبه وکړه .
د امو له لوري عطا الله ښه بالنګ وکړ او د بست ۴ لوبغاړي یې وسوځول.
ددې په ځواب کې د امو لوبډلې په ۶۳ اورونو کې د لسو لوبغاړو په سوځیدو ۲۳۳ منډې جوړې کړې، شوکت ۷۵ منډو سره ښه لوبه وکړه، د بست له لوري نسیم ۴ او شبیر نوري هم ۴ د امو لوبغاړي وسوځول.
د بست لوبډلې په لومړي وار کې د ۴۶ منډو تاوان سره خپل دویم وار (اننګز) پیل کړ او په ۶۶ اورونو کې یې ۲۴۹ منډې جوړې کړې، ګلبدین ۹۱ منډو سره ښه وځلید. د امو له لوري جمعه ګل د بست ۴ لوبغاړي وسوځول.
د ۴۶ منډو تاوان ویستلو سره بست امو ته د ۲۰۳ منډو هدف وټاکه او د امو لوبډلې وکولی شو چې دغه هدف د ۶ لوبغاړو په سوځیدو ترلاسه او لوبه وګټي. میرویس اشرف ۵۹ او شوکت ۳۶ منډو سره ښه وځلیدل.
د بست لوبډلې کپتان ګلبدین چې په دې لوبه کې یې په ټولیزه توګه ۱۲۰ منډې او ۴ لوبغاړي يې وسوځول ددې لوبې غوره لوبغاړی اعلان شو.
ددې لوبو نندارې لپاره ګڼ شمیر افغانان او ځایي مینه وال راغلي وو، دغه راز دافغانستان د کرکټ د ملي لوبډلې نړیوال روزونکی راشد لطیف هم ددې سیالیو نندارې لپاره راغلی دی.
هغه وایي چې افغان لوبغاړي ښه وړتیاوې ولري او کولی شي د نړۍ تکړه لوبډلو ته ماتې ورکړي.
نوموړي وویل چې ددې سیالیو په پای کې به دوی وکولی شي بیلا بیلو ملي لوبډلو لپاره ښه او تکړه لوبغاړي لاسته راوړي
