قاموسونه ټکی کام د پښتو او هالنډي ژبو مينه والو ته زيری ورکوي چي نوموړې پروژه د کوچني اختر په مبارکه ورځ د هالندي پښتو لومړی قاموس آنلاين کوي.

د هالنډي پښتو دغه قاموس په بشپړه توګه کنټرول سوی او ژباړه يې د اعتبار وړ ده. د دغه قاموس جوړېدل د ځوان او پتمن افغان ليکوال ميرويس رشيد د زښت زيات زیار او هڅو پايله ده. نوموړي د قاموسونه ټکی کام سره د دغه قاموس په جوړونه کي ډېر تکاليف پر ځان ګاللي چي له امله يې قاموسونه ټکی کام پروژه ډېره منندويه ده.

د قاموسونه ټکی کام پروژه غواړي چي پښتو ژبه د ډکشنريانو يا قاموسونو په ډګر کي د نورو ژبو سياله کړي. د هالنډي پښتو قاموس د نوموړې پروژې 57 م پښتو قاموس دی چي په وړيا توګه يې خپلو هيوادوالو ته د کار اخيستنې لپاره پر www.qamosona.com  وېبپاڼه وړاندي کوي.

قاموسونه ټکی کام پر پښتنو ږغ کوي چي د روانو پروژو په لړ کي ورسره عملي او علمي مرستي وکړي. که غواړئ د دغې پروژې سره دنوؤ قاموسونو په جوړونه او پخوانيو په پراخونه کي مرسته وکړئ نو د لاندنۍ برېښناليک پتې له لاري راسره اړيکي ټينګي کړئ(د برېښناليک پته بېله ستورو ** وکاروئ):
info**@**qamosona.com

نوموړې پروژه د کوچني اختر په مناسبت خپلو ټولو هيوادوالو او ټولو مسلمانو ورونو او خوېندو ته مبارکي وايي.

د قاموسونه ټکی کام مسؤل چلوؤنکی
احمدولي اڅکزی، المان