لراوبر ویب پاڼه لراوبر يو افغان – تازه خبرونه
اختره که راځې نو ولولو سره راځه
د مينې ځېرۍ راوړه د پلمو سره راځه
دا رنګارنګ ګولونه د افغان سره غنچه کړه
غاټول،نرګس،ريدي زمونږ د بڼ سره جرګه کړه
د روغې ،جوړې ځېرۍ شه جرګو سره راځه
اختره که راځې نو ولولو سره راځه
د مينې ځېرۍ راوړه د پلمو سره راځه
جرګه شه ، ننواتې شه مليار ته په خپلوۍ شه
سندره شه بلبل شه هر صياد ته په زارۍ شه
قدم د بختور هم په لېمو سره راځه
اختره که راځې نو ولولو سره راځه
د مينې ځېرۍ راوړه د پلمو سره راځه
د ډول،ډول ګولونو معطرو ښه دسته شه
دا ځينو وچو کلکو دماغونو ته وږمه شه
نسيم شه د سحر ښکولو وږمو سره راځه
اختره که راځې نو ولولو سره راځه
د مينې ځېرۍ راوړه د پلمو سره راځه
د شنه سپرلي په طمع زمونږ هر څه لاس په لاس شول
د سره اوړي غوبل کې د ملي هؤيت نه خلاص شول
اوس د تور ژمي ناورين ته د ډيؤو سره راځه
اختره که راځې نو ولولو سره راځه
د مينې ځېرۍ راوړه د پلمو سره راځه
ځيانمن ملي وحدت کړ ،د ستم ستمګرانو
تالا والا ګلشن مو کړ د دين ټېکه دارانو
د صلحې او صفا د هرکلو سره راځه
اختره که راځې نو ولولو سره راځه
د مينې ځېرۍ راوړه د پلمو سره راځه
دا ماتو زخمي زړونو ته خمار راړوړه او جام راوړه
پيام د خوښي،جوش د مستي مونږ ته تل مدام راوړه
ځوانان ،پېغلې همزولي په زيارت د مهترلام راوړه
ټاټوبې د حامد ته د مېلو سره راځه
اختره که راځې نو ولولو سره راځه
د مينې ځېرۍ راوړه د پلمو سره راځه
د ٢٠٠٩کال د فبرورۍ ٢٥مه کليفورنيا
