افغان سرحدي پوليسو برايي د کندهار ولايت په معروف ولسوالي کي دوه تنه ماين ښخوونکي چي د ډيورنډ له ها خوا راغلي ول ووژل.
د کندهار د ولايت مقام خبرپاڼه وايي دغه دوه تنه برايي پر ١٢ بجې د کندهار د معروف او د زابل ولايت د شملزو ولسواليو ترمنځ په (جنګ برج) کلي کي د سرحدي پوليسو د ګزمې لخوا هغه وخت ووژل سول، چي غوښتل يې پر يوه خامه لاره باندي ماينونه ځاى پر ځاى کړي.
له دې کسانو سره ٥ کړۍ ماينونه او يو ميل کلاشنکوف ورسره ول چي هغه هم د سرحدي پوليسو لاسته ورغلي دي.
د کندهار چارواکي وايي دې ولايت ته اکثره وخت د ډيورنډ پولي له ها خوا سيمو چي د پاکستان تر کنټرول لاندي دي، ډېر شمېر وسله وال او ماين ښخوونکي راځي او دلته تر تروريستي عملياتو وروسته بيرته پاکستان ته ځي.
د کندهار چارواکي وايي د دولت وسله وال مخالفين د پاکستان تر حاکميت لاندي سيمو کي کمپونه لري او پاکستاني پوځيان يې نه يوازي مخنيوى نه کوي، بلکي افغانستان ته په رالېږلو کي مرسته ورسره کوي.