لراوبر ویب پاڼه لراوبر يو افغان – تازه خبرونه
پرون د پولنډ د بهرنيو چارو وزير ردوسلاو شکورسکي Radoslaw Shkorski له خپل افغاني سيال ډاکټر رنګين دادفر سپنتا سره ، په کابل کې يوه ګډه خبري ناسته کې حکمتيار يو جنايتکار وباله .
پولنډي وزير همدارنګه ټينګار وکړ چې د حزب اسلامي مشر انجينر ګلبدين حکمتيار سره دې خبرې نه کېږي او هغه دې د محاکمې ميز ته راوړاندې شي .
په دغه غونډه کې که څه هم لکه وړاندې چې وويل شول ، سپنتا حاضر و خو هغه د پولنډي وزير فرمايش ته ځواب ونه وايه او دومره يې وويل چې له ترهګرو سره د مبارزې يو اصل خبرې اترې هم دي ، خو حکومت به يې له ترهګرو سره په ټول ځواک جنګېږي .
پولنډي وزير په داسې حال کې حکمتيار جنګي جنايتکار و باله او د هغه د محاکمې غوښتنه يې وکړه چې په دې وروستيو کې له حکمتيار سره د خبرو اترو ګونګسې ډېرې شوي دي .
له څرخي زندان څخه د حکمتيار د زوم غيرت بهير خوشې کېدل ، د ځينو په باور د همداسې هڅې يوه برخه ده .
له بلې خوا پولنډي وزير په داسې حال کې د حکمتيار په محاکمه ټينګار کوي ، چې تېره اونۍ د هند – افغانستان د بهرنيو چارو وزارتونو په يوه ګډ کنفرانس کې سپنتا ويلي و چې نور هېوادونه بايد دا ومني چې افغانستان خپلواکه کړنلاره لري .
سپنتا ، ددې پوښتنې په ځواب کې چې د هند او افغانستان نږدې والي ، ګاونډي هېواد پاکستان اندېښمن کړى دى ، وويل :
(( څوک چې اندېښنې کوي ، اشتباه کوي ))
خوپرون د همدغه خپلواکې پاليسۍ لرونکي حکومت خارجه وزير سپنتا ، د پولنډي وزير ته ونه ويل چې زموږ پاليسي مستقله او په دې اړه ستا اندېښنه بېځايه ده .
شپږ کلونو جګړو وښوده چې مخالف وسلوال ځواکونه د حکومت او بهرنۍ نړۍ له لافو سره – سره يو کمزورى او د ځپلو وړ ځواک نه دى .
دغه مخالف ځواک اوس دنړۍ د څلوېښتو هېوادونو شاوخوا ( ٥٣ ) زره پرمختللى پوځ ، ملي اردو او ملي پوليس اندېښمن کړي دي او ټول هېواد ، حتى مرکز ته يو ستر ګواښ دى او له هغوى سره له خبرو پرته ټيکاو ناشونى دى .
د پولنډي وزير پرونۍڅرګندونې ، نوې خبره نه ده ، هرکله چې زموږ په هېواد کې د سولې او خبرو اترو لپاره هڅه پيل شوې ، بهرنۍ نړۍ او د هغوى کورنيو لاسپوڅو يې د ځپلو هڅه کړې ده .
وګورئ ، د بشرحقونو د څار نړيواله ټولنې د افغانستان د جنګي جنايتکارانو راپورونه څو ځلې په داسې وخت کې خپاره کړي او داسې وخت کې يې د جنګي جنايتکارانو نومونه په ډاګه کړي چې د سولې لپاره يواځې يوه وړه هيلمندي ښکاره شوې ده .
شايد نړيوال هېوادونه د خپلو اوږدو ګټو لپاره په افغانستان کې ناامني و غواړي او شايد دهمدې موخې لپاره د سولې هڅې شنډې کړي .
بهرني هېوادونه که زموږ د هېواد په جګړه کې هره ګټه لري ، هغه نه ده روښانه خو يو څه روښانه دي او هغه داچې په هېواد کې د جګړې اوږدېدل زموږ له تباهي ، فقر ، بدبختۍ پرته نوره هيڅ پايله نه لري .
په کار ده چې د مستقلې پاليسي ( !) لرونکي هېوادونه ، په خپل ولس ورحمېږي او د خپل هېواد او ولس د ګټې لپاره د نورو فرمايشونو ته غاړه کېنږدي .
ښاغليه زه ستا په هدف پوه نه شوم چې څه ويل غواړې؟ ايا ستا مطلب دا دى چې کومو خلکو جنايتونه کړي دي او کوي يې او د افغانستان په ورانولو پسې يې راخيستې ده او افغانان د چرګانو په څېر ذبح کوي نو که هغوى ځواکمن وي خبرې دې ورسره وشي؟ زه خو وايم پکار ده چې په پاکستان باندې هم بريد وشي تر څو دغه د طاعون مرض د نړۍ د سر څخه پاک کړاى شي. امريکايان بايد دې ته مجبور کړاى شي چې مستقيماً په پاکستان باندې بريدونه وکړي.
دا خو ستا ښه دليل دى، سبا به سل کسان يو ځاى کېږي، غلاوې او شوکې به کوي او بيا د دولت څخه غوښتنه کوي چې خبرې دې ورسره وشي. ته به وايې خبرې دې ورسره وشي ځکه چې دوى دولت ته سردردى پېدا کړى دى. ترورستان او غله که په خپله تسليم شي او په امن اوسېده وغواړي نو بيا د هغوى ځپل به ظلم وي، خو که ټوپک يې په لاس کې وي او جنايتونه د دې لپاره کوي چې خپل زور وښيي او دولت خبرو ته تيار کړي نو دا زما په فکر لا يو غټ جنايت دى او هيڅکله ورته دولت بايد تسليم نشي. او که څوک د دغې خبرو ملاتړ کوي نو دا هسې يوه احمقانه هڅه ده چې د يو ليکوال او باشعوره سړي څخه يې تمه نشي کېداى.