دکندهار ولایت مقام دمطبوعاتي دفتر څخه په خپره سوې خبرپاڼه کښي ویل سوي دي چي دافغان امنيتي ځواکونو له خوا د يو لړ عملياتو په ترڅ کي په خاکرېز کښي د دښمن څلور تنه وسلوال د يوه هوايي بريد په وسیله له منځه وړل سوي دي. په خبرپاڼه کښي دیادي ولسوالۍ دعملیاتو ځای نه دئ ښوول سوي خو چارواکي وايي چي یاد عمليات د خاصو افغان امنيتي ځواکونو له خوا سهار شپږ نيمي بجې تر سره سوي چي د دښمن د څلورو تنو جنګياليو د وژلو تر څنګ درې کلاشنکوفونه، درې موټرسايکلونه او يو دوربين د افغان امنيتي ځواکونو لاس ته ورغلی دئ.
همدارنګه خبرپاڼه زیاتوي چي د معروف ولسوالۍ په عالي جرګه نومي سيمه کښي ډيورنډ کرښي ته څېرمه د افغان سرحدي ځواکونو له خوا دښمن ته کمين نيول سوی ؤچي په ترڅ کي ئې د دښمن څلور تنه وسلوال وژل سوي، يو موټر سايکل څلور کلاشنکوفونه د افغان امنيتي ځواکونو لاسته ورغلي.
دکندهار ولایت مقام دخبرپاڼي له مخي د يادو غبرګو پیښو پر مهال افغان امنيتي ځواکونو ته هيڅ مالي او ځاني زيان نه دئ اوښتی. وسله والو طالبانو تر دې مهال دپیښي په اړه څه نه دي ویلي.