د کندهار پر نارنج تاريخي ماڼۍ ښکاره غصب او کيندني

د کندهار د اطلاعاتو او کلتور رياست چارواکي وايي، چې يوه کس په خپلسري ډول د نارنج ماڼۍ يوه برخه ددې لپاره تخريب او ويجاړه کړې، چې غوښتل يې کور پرې جوړ کړي.

ددغه کيندني پر مهال د نارنج ماڼۍ دوه برجونه او تاريخي لوښي له منځه تللي.

په کندهار کې د تاريخي اثارو او ځايونو غصب او قاچاق اوس تر دې حده رسېدلى، چې زورواکي يې په ښکاره غصب او کيندني کوي.

ويل کيږي، چې نن سهار پنځه بجې د شاولي په نوم يوه کس د نارنج ماڼۍ په شمالي برخه کې په خپلسري ډول په لوډر سره د ماڼۍ څو برجونه نړولي او هلته يې د دريو مترو په اندازه مځکه کيندلې.

ددغې کيندې له امله هلته د کلونو – کلونو تاريخي اثار موندل سوي، چې وروسته ځينې قاچاق او ځينې يې په لوډر مات سوي دي.

دغه کيندنه په داسې مهال کېږي، چې د ښاروالۍ د شپږمي ناحيې مديريت او د پوليسو يوه پوسته يې په څنګ کې موقيعت لري.

خپله د نارنج ماڼۍ غاصب او کيندونکى وايي، چې دا کار په پټه نه کوي او د نارنج ماڼۍ مځکه خپل ملکيت بولي، چې د دولت په اجازه يې کار پرې پيل کړى دى.

د شاولي په نوم دغه کس هغه اسناد هم ښکاره کړل، چې د کندهار د ډنډ ولسوالۍ د ابتدائيه محکمې، کادستر، قضايي دولت او ښاروالۍ د مسولينو لاسليک او تائيد ورسره وو.

دده په وينا، شريعي قباله لري، چې ياده مځکه يې د دوه اعشاريه پنځه اويا جريبه په اندازه په ١٣٩٢ کال کې په څلوېښت لکه افغانۍ رانيولې ده.

د کندهار د اطلاعاتو او کلتور رياست مسولين وايي، چې نن سهار د نارنج ماڼۍ ورانه سوې برخه د مقدوني اسکندر د دورې د فيلانو د تمځاى يوه برخه وه.

ددغه رياست د تاريخي ابداتو د ساتنې مدير عزيزاحمد عزيز وايي، چې د کيندنو پر مهال يو شمېر تاريخي اثار قاچاق سوي او دوې کولالۍ تجرۍ، چې باستاني لوښي پکښې وه، له منځه تللي.

هغه په دې برخه کې د اندېښنې په بيانولو وايي، چې د نارنج ماڼۍ پر نورو برخو هم غصب او تالان روان دى.

دده په وينا، چې همداوس هلته په ښکاره لسګونه کورونه جوړ سوي، د مځکې څخه يې د کرنې کار اخيستل کېږي او په زياتو برخو کې يې د برمو وهل جريان لري.

هغه ومنل، چې ديادو تاريخي ځايونو په ساتنه کي پاته راغلي ، ځکه دولت د اطلاعاتو او کلتور رياست پر ځاى د غاصبينو سره لاس يو کړى دى.

ستونزه مو د کندهار ښاروالۍ د مسولينو سره شريکه کړه، خو هغوئ يې په اړه نظر ورنه کړ.

په همدې مهال د کندهار د استناف محکمې رئيس قاضي عبدالغفار صائم د شاولي په نوم د نارنج ماڼۍ د ويجاړونکي هغه ادعا ردوي، چې ګواګي د محکمې شريعي قباله په لاس کې لري.

دده په وينا، چې ياد کس د افغانستان د اساسي قانون څخه سرغړونه کړې او هم تاريخي اثار تخريب او غصب کړى دى.

هغه وايي، چې د اساسي قانون له مخې حتى ولسمشر صلاحيت نه لري، چې تاريخي سيمې وپلوري او غوښتنه کوي، چې قضايې دولت بايد په دې برخه کې څېړنه وکړي.

نارنج ماڼۍ د کندهار د زاړه ښار په څنډه کې ٢٣٣٣ کاله وړاندې د مقدوني اسکندر د امپراطورۍ پر مهال ودانه سوې ده.

دغه ډول ماڼۍ، چې هغه مهال پوځۍ اډه وه، په ټول افغانستان کې يولس اسکندريې وې، چې د نورو يې څرک نه سته، او د نارنج ماڼۍ هم د هغوئ د سرنوشت سره مخ ده.