کور / #PTM / منظور پښتين وايي، رياست د پي ټي ايم غړي په بېلابېلو تورونو نيسي

منظور پښتين وايي، رياست د پي ټي ايم غړي په بېلابېلو تورونو نيسي

د پښتون ژغورني غورځنګ مشر منظور پښتين وايي، چي رياست ددوی په لسګونو غړي پرته له کوم جرم نيولي او لا هم د نورو غړو نيولو لپاره کارواياني کوي.

ښاغلي پښتين چي د مشال راډيو سره ئې تازه مرکه کړې ويلي، له کله نه چي دا غورځنګ جوړ سوی شاوخوا ۷۰۰ کسان نيول سوي او ځيني بېرته خوشي سوي دي، مګر اوس مهال د رياست په زندانونو کي د پي ټي ايم ۲۷ مهم کسان بنديوان دي.

ښاغلی پښتين وايي، د نيول سويو کسانو په هکله ايف آی آر ( لومړني تحقيقاتي راپورونه) ټول دروغ او بې بنسټه دي.

له دې وړاندي د غورځنګ يوې بلي مخکښي فعالي ثنا اعجاز ويلي، چي دې ته هم د بېلابېلو لارو ګواښونه کېږي او ددوی ملګري ځورول کېږي.

دا پر داسي مهال ده چي ترهګر رياست پرون د پي ټي ايم د مردان ضلعي مشر اقبال هوتي نيولی دی او دلته ئې د پښتون ژغورني غورځنګ د نورو غړو پرضد هم مقدمې درج کړي دي.

د جون مياشتي پر ۵ نېټه د اقبال هوتي په شمول د پي ټي ايم پر ډېرو مشرانو د رياست ضد نعرو وهلو مقدمې درج سوي وې چي په دوی کي ګڼ کسان د ترهګر رياست لخوا نيول سوي دي.

تر دې وړاندې داګست دمیاشتې په وروستیو کي په جنوبي وزیرستان کي دپښتون ژغورنې غورځنګ دمشر منظور پشتین او دپي ټي ایم دیو شمیر نورو فعالینو په ضد هم مقدمې درج سوې وې . ددې ترڅنګ د پي‌ ټي ایم مشران وايي، چي دهغوی ګڼ شمیر فعالین دهیواد دبیلابیلو برخو څخه نیول سوي او‌ زندانونو ته اچول سوي دي.

د اقبال هوتي پر وړاندي هغه وخت مقدمه درج سوه، چي کله د کوچني اختر په شپو کي په پېښور کي د پي ټي ايم د جلسې د ګډوډولو لپاره ترهګر پال پوليس راغلل، دغه جلسه ئې خرابه کړل او په لسګونو کسان ئې ژوبل کړل.

د پاکستان ترهګر رياست تل هڅه کوي چي د پښتنو مبارزه پيکه کړي او هغوی د خپلو حقوقو له غوښتني څخه لاس پر سر کړي. خو د پي ټي ايم مخکښو غړو ژمنه کړې چي دوی به خپلي مبارزې ته ادامه ورکوي.