لیکوال: الوارودی لایګلسیا (هسپانیا)

موږ ژورنالستان همدا چې واورو فلانی نامتو بهرنی هسپانیا ته راغلی دی، ژر تر ژره ځان د هغه د اوسېدو هوټل ته رسوو، په زرو نیرنګونو اوچلونوځان د هغه کوټې ته وررسوو، صبر کوو چې له تشنابه راووزي، هغه وخت خپله لومړۍ پوښتنه طرحه کوو:

آیا ريښتیا د هیبرید ټاپو وزمه د نړۍ تر ټولو ښکلې سیمه ده؟
بهرني سړي پخپله ژبه راته غورېږي:

ارتو!… مې سنو… بامبو… تاکو…بوم.
او دا چې موږ هم د هغه په ژبه نه پوهېږو، سمدلاسه د هغه ځواب څنګه مو چې «درک» کړی ياددښت کوو، بیا پوښتنه کوو: 

ستاسې په نظر زموږ ښکلی هېواد هسپانیا څنګه ځای دی؟
او هغه ځواب راکوي:

تاتو… پاتی… ګولي… مولي…
او موږ «پوهېږو» چې مثلاٌ وایي «ډېر خوښ یم چې د هسپانیا ښکلې خاورې ته راغلی یم.»

وروسته پوښتنه کوو:

له هسپانیا څخه ستاسې خوږه خاطره کومه ده؟
بهرنی وګړی بیا پیل کوي:

ټکونیا ایلخی نیا… تیمپا… تیمپا.
طبيعي ده چې موږ د هغه د لاسونو له حرکته پوهېږو چې وايي: 

په لومړي ګام کې ستاسې د افسانوي او میلمه پالې خاورې ښکلي خلک، سړی په هسپانیا مینوي، زه د هسپانیا په ښکلا کې لاهو يم.
وروسته له هغه خپله ډېره په زړه پورې ژورنالستیکه پوښتنه کوو:

آیا ستاسو لپاره چې له یوې سړې سیمې څخه راغلي یاست د هسپانیا تود لمر او شین آسمان حیرانوونکی نه دی؟
هغه وايي:

ګوري، ګوري
او موږ پوهېږو چې د دوی په ژبه کې «ګوري» هو ته وايي، طبیعي ده چې بل پوښتنه مو داده:

ستاسې لپاره د هسپانیې کومه برخه ډېره په زړه پورې ده؟
هغه څه چې دی وایي موږ ته لا دمخه معلوم دي.

لکه سویس او د اروپا اندلس او ګالیسیا مشهور ځایونه په هسپانیا کې د بهرنیانو د پام وړ دي. خو کیدای شي دغه سیمې بهرنیان په نورو نومونو وپېژني. په هر حال موږ د هغه مقصد درک کړی دی.

له دغو خبرو اترو وروسته د بهرني سړي څو ناست، ولاړ او پراته عکسونه اخلو او خدای پاماني ورسره کوو. البته په پای کې هغه بیا «کومبو، نانګو… سویسو موسیو» وايي، چې هر احمق کولای شي د هغه مقصد درک کړي، یعنې خوښ یم چې له ماسره مو مرکه وکړه، د هسپانیې هېواد په دې وروستیو کې ډېر پرمختګ کړی دی.

او مسوؤل مدیر زموږ د مرکې په لېدو سره پخپل پوست کې نه ځائېږي. په تېره چې مرکه ډېره دقیقه او مستنده او له عکسونو سره مل ده. نامتو بهرني سړي څه ښه خندلي او څنګه یې له خوښۍ غاښونه معلومېږي.