لولپه د افغان مېنه په اورونو
کور په کور، کلي په کلي له بمونو

ابو جهل او فرعون يې مځکي سرې کړې
د وړو زړو په قتل او خونونو

خپل، پردي يې په نا کړې ګونا وژني
هره ورځ يې محشر ګډ په ولسونو

د لېوانو پرې يرغل له هره لوري
سر يې نېست، مال يې تالا په تاړاکونو

چي زمرو يې و پلو ته کتای نسوه
نن يې هر ګېدړ حرم ته په ټوپونو

غر و سمه يې له درد، المه ژاړي
هم فرياد يې عرش ته رسي له ظلمونو

تاج و تخت به يې نسکور سي ته يې ګوره!
د دې کام له ساندو، کرږو او اهونو

زه هارون په هغو وياړم، ترې جارېږم
چي د ننګ په لار کي تېر سوه تر سرونو