د ویسا خپلواکې ورځپاڼې په افغانستان کې د امریکايې سرتیرو په شمیر کې زیاتوالي ته په اشارې دا اټکل کړې دې چې امریکا به په افغانستان کې پراخ  پسرلني پوځي عملیات وکړي.

ورځپاڼې د موضوع په دوام وړاندې لیکلي دي چې واشنګټن د جګړې په برخه کې خپل سیاسي تمرکز له عراق نه افغانستان ته اړوي او دلته خپله نوې پوځي ستراتيژۍ پلې کوي.

ورځپاڼې پخپله سرمقاله کې د ناټو د عمومي قومندانۍ په وروستي حکم تبصره کړې چې هدف يې د ملکي خلکو د مرګ ژوبلې مخنیوې  او د افغانانو د دیني ارزښتونو درناوې دې.

ورځپاڼې د خپلې تبصرې په دوام هیله څرګنده کړې چې له دې سره به په افغانستان کې د عامه خلکو مرګ ژوبله پاې  ته ورسیږي.

د هیواد دولتي ورځپاڼې پخپله سرمقاله کې د انتخاباتو د نیټې ځنډ ته په اشارې دا پوښتنه کړې چې څه شۍ زیات ارزښت لري د انتخاباتو نیټه اوکه ازاد، راڼه او عادلانه انتخابات؟

ورځپاڼې د موضوع په دوام لیکلي دي چې د جمهوري ریاست راتلونکي انتخابات د څرګندونو دلایلو له مخ ځنډول شوي او سیاسي کړۍ باید له هغې نه د سیاسي بحران د رامنځ ته کولو لپاره ګټه وانخلي.

د ارادې خپلواکې ورځپاڼې بیا د امریکا د  مرکزي ځواکونو د پخواني قومندان په حواله لیکلي دي چې د افغانستان ستونزې پوځي حل لاره نلري.

ورخپاڼې د موضوع په دوام د هغه دا سپارښتنه هم راغستې چې د افغانستان د روان بحران د حل لپاره باید ټول نړیوال قدرتونه همکاري وکړي.

ورځپاڼې په یو بل ځاې کې د پاکستان د مشهور ژورنالسټ احمد رشید دا وینا  راغستې چې پاکستان د طالبانو په وړاندې د مبارزې لپاره کومه ځانګړې طرحه نلري.

ورځپاڼې د نوموړي په نقل وړاندې لیکلي دي چې د سوات دره همدا اوس د طالبانو او القاعده په لاس کې ده.

د راه نجات نا دولتي ورځپاڼې بیا د افغانستان د جمهوري ریاست د راتلونکو انتخاباتو شاته غورزول د اساسي قانون سپکاوې بللې دې.

ورځپاڼې وړاندې لیکلي دي چې په افغانستان کې د انتخاباتو قانون اصلا موجود ندې او که وي هم باید د اساسي قانون تابع وي.

ورځپاڼې پخپله سرمقاله کې هم د انتخاباتو د ځنډولو مسله راغستې او پوښتنه يې کړې چې ایا دا انتخابات به په ځنډ سره هم ترسره شي؟

ورځپاڼې په یو بل ځاې کې د کندز د والي په حواله  لیکلي دي که چیرې ناټو خپل اکمالاتي کاروانونه د منځنۍ اسیا له لارې افغانستان ته راوړي نو د شمال چارواکي د هغو د امنیت د ساتلو لپاره چمتو دي.

د اصلاح او انیس دولتي ورځپاڼو هم د افغانستان او سیمې په روانو حالاتو خبرونه او تبصرې خپرې کړیدي.

انیس هم پخپله سرمقاله کې د انتخاباتو د نیټې اعلان ته په اشارې په هغې کې د خلکو د مشارکت په اهمیت ټینګار کړې دې.

خو اصلاح بیا پخپله سرمقاله کې لیکلي دي چې پوځي ځواک باید د سولې په راوستلو کې وکارولې شي.

د ملي ارمان نا دولتي ورځپاڼې په یو مطلب کې له ولس مشر  نه غوښتې دي چې د انتخاباتو د خپلواک کمسیون چارواکي باید محکمې ته وروپیژني ځکه د ورخباڼې په وینا دوې د انتخاباتو د نیټې په شاته غورزولو سره اساسي قانون مات کړې دې.

ورځپاڼې پخپله سرمقاله کې بیا دا ادعا کړې چې د انتخاباتو خپلواک کمسیون د انتخاباتو نیټه د ولس مشر په لارښوونه شاته غورزولې ده

ورځپاڼې په یو بل مطلب کې د شکایتونو د اوریدو د کمسیون د رئیس اسداله وفا په حواله لیکلي دي چې په ننګرهار او لغمان ولایتونو کې زیات اختلاس  شوې دې.