دلیبیا د بې وسه او مظلوم ملت زغورل که دخپلو استعماري او اقتصادی مصلحتونو خوندي ساتل ؟

 د لویدیځ استعمار د تاریخ په اوږدو کې د ضعیفوو هیوادونو په منابعو باندې تکیه کړې ده ، د ډیموکراسۍ تر سیاسي شعار لاندې ئې  خپلو اقتصادي مصلحتونو ته لاره کتلې ده . هر نظامي خوزښت ئې که د سیاسي شعار تر پوښښ لاندې پیل شوی دی ، خو په پای کې ئې اقتصادي مصلحت  رابربنډ شوی دی ، په هر نظامی او سیاسي تحرک کې ئې اقتصادي مصلحت نغښتي دی ، د ډیموکراسۍ تر شعار لاندې ئې په ګڼ شمیر اسلامي هیوادونو کې د مظلومو ملتونو څخه خپله خپلواکي اخیستې ده ، د انسانیت او انساني ارزښتونو په ضد ئې جګړه پیل کړې ده ، خلک ئې له دیني ، فرهنګي ، سیاسي او اقتصادي خپلواکۍ څخه بې برخې کړي دي ، هغه جرمونه او جنایتونه چې په اسلامي هیوادونو کې د ډیموکراسۍ تر شعار لاندې تر سره کوي د انسانیت په تاریخ کې ساری نه لري ، ډیموکراسۍ خلکو ته د درنو درنو بمونو او راکټونو په ذریعه وړاندې کوي ، سپین ژیري ، ښځي او کوچنیان د ډیمکراسۍ لپاره وژني ، څرنګه چې  ئې په ګران افغانستان کې په تیرو څو ورځو کې بې ګناه معصوم اطفال په بې رحمانه ډول ووژل او لا ئې وژني ، د توپونو او الوتكو په زور خلك د لويديځ تهذيب او تمدن ته چمتو كوي , دا د ځنګل خپلواكي او تګلاره ده چې له پيړيو څخه ئې د خپلواكۍ دژغورلو تر نامه لاندي په نړۍ كې پكار اچولې ده ,امريكا او لويديځ په اسلامي نړۍ كى د خپلواكۍ د ژغورلو لپاره داسي زندانونه جوړ كړي دي چې د بشريت په تاريخ كى سارى نلري , پدي زندانونو كى چې كوم وحشت او بربريت د انسانيت په ضد تر سره كيږي ټوله نړۍ تري خبره ده , پدي زندانونو كى چى كوم كرغيړن سلوك د بشريت سره كيږي د خپلواكي په مخ داسي څپيړه  ده چى هيڅ كله به د انسانيت له ذهن څخه هيره  نشي , د انسانيت كرامت تر پښو لاندي كيږي , هر هغه څه چى د خپلواكۍ سره تړاو لري دلته تر پښو لاندي كيږي  , انسان د حيوان په وړاندي بي عزته كيږي , د ګوانتناما  , ابوغريب , بګرام , ……… … د زندانونو د وحشت نه ډكې كيسې بشريت ته د لويديخ د خپلواكۍ تحفه ده , دا زندانونه د امريكا په ټنډه كې هغه د پيغور تور داغونه دي چې هيڅكله به ورك نشي , دا دلويديځ د خپلواكۍ په هنداره كې هغه داغونه دي چې په ځلانده توګه هر چا ته ښكاري  , امريكا او لوديځ خپلواكي په زندانونو كى ژغوري , بشريت ته خپلواكي په زندانونو كى ښي .

خو نن د لویدیځ دا استعماري ځواکونه په ډیره چټکتیا سره د لیبیا د بې وسه ملت ژغورلو ته ولې رادانګي ، آیا  په ریښتیا لویدیځ د دغه توراو کرغیړن تاریخ سره چې د ملتونو په استعباد کې ئې لري دې ته حاضر شوی چې د لیبیا مظلوم ملت د قذافي له جبر او ستم څخه وژغوري او که غواړي چې خپل اقتصادي مصلحتونه خوندي کړي ؟ .

 له یوې مودې څخه په عربي نړۍ کې د استبدادي نظامونو په ضد د ملي پاڅونو بهیر روان دی ، دا بهیر له تونس څخه پیل او مصر ته منتقل شو ، او په ګڼ شمیر نورو هیوادونو لکه یمن ، بحرین ، الجزایر .. کې هم دا بهیر پرمخ روان دی ، خو په غیر مترقبه توګه په ډیر قوت سره ئې چې ګمان نه کیده  په لیبیا کې  سر راپورته کړ . په لیبیا کې د معمر القذافي نظام له یوې اوږدې مودې څخه د لیبیا په مظلوم ملت باندې مسلط دی ،که څه هم چې لیبیا د اقتصاد له لحاظه ډیر غني هیواد دی ، خو د لیبیایانو د ژوند سطحه دومره ښه نه ده څرنګه ئې چې اقتصاد پیاوړی دی  . لیبیا  یو له هغو هیوادونو څخه دی چې د اوروپا په دروازه کې پروت دی ، اوروپا ته ډیر لڼډ هیواد  دی ، او د اوروپا د ځینو هیوادونو لکه فرانسه او ایطالیا د سوخت مواد (پټرول ) له همدې هیواد څخه تر لاسه کیږي ، هغه څه چې د نړۍ اقتصاد او صناعتي ماشین پرې اعتماد لري ، او د لویدیځ د اغلبو استعماري یرغلونو او اشغالونو لامل همدا پټرول دي .

دقذافي د نظام په وړاندې په لیبیا کې ملي پاڅون د دغه هیواد نورمال حالت زیانمن کړی دی ، په تیره بیا په هغو سیمو کې چې د پټرولو ذیرمې دي ، نو لدې ځایه هغه هیوادونه لکه فرانسه او ایطالیا د دغه غیر نور مال حالت څخه زیانمن کیږي ، او اقتصاد ئې له ستونزو سره مخ کیدای شي ، نو لدې کبله ئې د خپل هدف لپاره په لیبیا کې د نظامی مداخلې بهیر کړندی کړ ، تر څو د لیبیا دغه غیر نورمال حالت ته دپای ټکي کیږدي ، او له بله اړخه خپل بایللی حیثیت هم تر یوه حده په اسلامی هیوادونو کې په دې نامه اعاده کړي ، چې ګواکی د لیبیا د مسلمان ملت سره ئې مرسته وکړه او هغه ئې د قذافي له ظلم څخه وژغوره ، خو دا راز کړکیچن حالت خو په ډیرو هیوادونو کې جریان لري او جریان ئې درلود ولې ئې هلته د ورته نظامي مداخلې هڅه ونه کړه ، روښانه ده چې په لیبیا کې د خپلو مقاصدو او مصلحتونولپاره لاس اوږدوي ، تر څو ژر تر ژره په لیبیا کې سیاسي استقرار او ثبات رامنځ ته کړي .

له کومه ځایه چې په لیبیا کې سیاسي استقرار او ثبات د اوروپا لپاره ډیر د اهمیت وړ دی ، پدې هیواد کې د نظامي بریدونو اقدام ډیر ژر بشپړ شو ، خو د پام وړ ټکي دا دی ، چې کوم مهال د لویدیځ د کوم هیواد مصلحت په خطر کې شي ، بیا ټول استعماري هیوادونه او نړیوالې موسسې سره متحدې شي ، او ډیر ژر په مشترکه توګه د خپلو اهدافو لپاره کار پیل کړي ، خو که کوم اسلامی هیواد د دوی همکارۍ او مرستې ته اړتیا ولري او دوی پکې مصلحت ونه لري بیا نه نړیوالې موسسې حاضریږي ، چې د نړیوال قانون په اساس د هغه هیواد مرسته ته ورودانګي ، او نه هم د لویدیځ ځواکمن هیوادونه . نو پدې کې شک نشته چې د لویدیځ د ځواکونو دا هوایی بریدونه یوازې د لویدیځ داقتصادي او سیاسي مصلحت لپاره تر سره کیږي ، او له اساسه د لیبیا د مظلوم ملت د ژغورلو موخه پکې مطرح نه ده خو په عربي کې یو متل دی چې وايي : رُبَّ ضارة نافعة) . کله ناکله کوم مضر کار ګټمن تمام شي  . کیدای شي چې دغه بریدونه د لیبیا د مظلوم ملت په ژغورلو کې ګټور تمام شي ، او د قذافي له جبر او ستم څخه ئې ژغورل ګړندی کړي ، الله تعالی د هر ظالم په سر بل ظالم مسلطوي ، تر څو ئې ظلم ته د پای ټکي کیږدي   .  وما ذالک علی الله بعزیز .