لراوبر ويبپاڼه په ټوله نړۍ کي افغانانو په ځانګړې توګه پښتنو ته په هيواد کي دننه او بهرمېشتو افغانانو کلتوري ، سياسي او ټولنيزو چارو په اړه په پرله پسې توګه معلومات خپروي.

لراوبر د نورو کلتوري ټولنو ،خيريه او تعليمي مؤسساتو او افغاني رسنيو خبرتياوي هم په وړيا توګه خپروي ، ډېر وختونه موږ ته داسي خبرتياوي راځي چي يوه ليکوال يا خپرندويي ټولني د نوي کتاب د چاپ د خبرتيا هيله کړې وي خو دايې نه وي ليکلي چي مينه وال دا کتاب چيري او له چا څخه له ترلاسه کړي .

ځيني کسان خو په دې اند هم دي چي د پښتو ويبپاڼو وړيا خدمتونو د هغوی نشراتي کيفيت راټيټ کړئ دی ، که دانټرنټ ويبپاڼي هم لکه چاپي اخبارونه و راډيوګاني او ټلويزيونونه د اعلان پر سر پيسې وغواړي هغه وخت به خبرتياورکوونکي هم يا له دغسي خبرتياو تېر سي يابه خپل د اړيکو پته او شمېره نه هېروي.

دداسي خبرتياو په خپرولو کي موږ هم زړه نازړه يو ، که يې نه خپروو هغوی چي کلتوري خدمت يې ترسره کړئ وي ګيله کوي چي ولي يې خبرتيا نه خپريږي ، که يې خپروو ، لوستونکو ته خبر ورسيږي خو د تماس نيولو يا لاس رسي لاره يې نه وي ورته څرګنده سوې .

د بېلګي په توګه په دې وروستيو په پرله پسې توګه د مشرق نړيوال تلويزيون لخوا ددوی د چينل د پرانستني خبرتيا راورسېده ، هر څو واره چي مو هيله وکړه چي د خپل چينل فريکونسي او د اړيکو شمېره راوليږي بيا هم يوازي هماغه خبرتيا راوليږل سوه او هيله يې کوله چي بس همدا ورته خپره کړو . چي په اړه يې د لراوبر ادارې ته هم يو شمېر مينه والو زنګ ووهه او هم يې په ليکلې بڼه د فريکونسۍ غوښتنه وکړه .

د بېلګي په توګه دغه وروستئ راغلئ ليک کټ مټ  خپروو ، په دې هیله چي مشرق ټلويزون والا  او ټول نور کسان چي خبرتيا ليکي دغسي مهيم ټکي په پام کي ونيسي .