د افغانستان د جګړې په هکله د ټرمپ لانجمنو څرګندونو د ګڼو افغان سياسيتوالو، عامو افغانانو او امريکايي څېړونکو غبرګونونه راپارولي دي.

تېره ورځ ډونلډ ترمپ د عمران خان سره د د خبرو پر مهال په سپينه ماڼۍ کي وويل، چي که دی وغواړي په يوه اونۍ کي د افغانستان جګړه ګټلای سي ، خو په دې کي به لس مليونه انسانان ووژل سي او افغانستان به د نقشې له مخي ورک کړي.

د يادو څرګندونو په هکله افغان دولت سخت غبرګون ښودلی  دی او ويلي ئې دي چيافغانستان د امريکا سره د ښې ملګرتيا هيله لري، خو دا په دې مانا نه ده چي د افغانستان برخليک دي د نورو کسانو په لاس کي وي.

له ارګ څخه په خپره سوې خبرپاڼه کي راغلي، چي افغانستان د نړۍ له پخوانیو ملت – دولتونو څخه یو دی چي د تاریخ په اوږدو کي له څو بحرانونو څخه راوتلی دی. د افغانستان ملت هیڅ بهرني قدرت ته د خپل برخلیک د ټاکلو اجازه نه ده ورکړې او نه به یې ورکړي.

همدا راز د افغانستان پخواني ولسمشر حامد کرزي سخت غبرگون ښودلی او د امریکایي صدر پرونۍ څرگندونې یې “د افغانستان ټولو خلکو ته لوی سپکاوی” گڼلی دی.

ښاغلي کرزي زیاته کړې چي د ټرمپ دغه څرگندونې، “د افغانانو او افغانستان په وړاندې د امریکا د مشرتابه پټ نیتونه څرگندوي او دا ښیي چي دوی ژوندانه او انساني کرامت ته هېڅ درناوی نه لري”.

President @realDonaldTrump, We are the Pamirs! You can't wipe out “The Roof of the World”.

— Hamid Karzai (@KarzaiH) July 23, 2019

طالبانو هم د ډونلډ ټرمپ څرګندوني غندلي دي او په يوې خبرپاڼه کي ئې ويلي دي: “د ټرمپ دا دريځ چي نه غواړي نور په افغانستان کي د پولیس رول اداء کړي او دا جګړه له یوه بشپړ ملت سره ده چي د دې ملت په ژوند یې نسي ګټلای، مثبت ټکي دي”.

د امریکا د جان هاپکنز یونیورسټي د نړېوالو مطالعاتو یو پروفیسر او سیاسي څیړونکی ډانیل مارکي وایي صدر ټرمپ د افغانستان د موضوع حل ته یوازې له دوه اړخه گوري. پروفیسر مارکي پخپل ټویټر کي لیکلي:

“ټرمپ په تکرار سره په افغانستان کي د امریکي پالیسي داسې ښکاره کوي چي گنې یو اړخ ته (د پاکستان په مرسته) د سوله ییزو مذاکراتو او یا بل اړخ ته د لسو میلیونو بیگناه وگړو د وژنې ترمنځ باید یو انتخاب وسي.”

Trump repeatedly frames US policy in Afghanistan as a choice between peaceful negotiations (with Pakistan's help) on the one hand, or killing 10 million innocent people on the other. https://t.co/YcW55M3CSG

— Daniel Markey (@MarkeyDaniel) July 22, 2019

د امریکا د پوځ یو تقاعد جنرال، باري آر مکافري په افغانستان کي د لسو میلینو خلکو احتمالي وژل، یو جنایت گڼي. هغه لیکلي: “په اووَل آفیس کي د ټرمپ دا عجیبه بحث چي په افغانستان کي د امریکا لخوا د ایټمي بم د استعمال او لسو میلینه کسانو د وژل کیدو په هکله و، تر ټولو غیرمسوولانه خیالات دي چي تر اوسه له یو امریکایي صدر څخه اورېدل سوي. هیڅ امکان نه لري چي د پوځ مشرانو دې پر دې طریقې لا غور کړی وي. دا به یوه جنایتکارانه طریقه وي.”

Trump bizarre Oval Office discussion of US using nukes in Afghanistan which would kill 10 million people one of the most irresponsible speculations ever heard from a US President. ZERO CHANCE JCS HAS EVER CONSIDERED. Would be a criminal option. https://t.co/pEu9XLbVvN

— Barry R McCaffrey (@mccaffreyr3) July 23, 2019

ډولنډ ټرمپ د امريکا په تاريخ کي يو له هغه ولسمشرانو څخه دی، چي د نورو هيوادونو په هکله ډېر وخت غير ډپلوماټيکه ژبه کاروي.