شپږم تاريخ، شپږ ورځي، شپږ برتانوي عسکر وژل سوي
په افغانستان کي مېشت برتانوي پوځيان وايي په روانه اونۍ کي يې شپږ ورځي پرله پسې يو – يو عسکر له لاسه ورکړئ دئ.
په کابل کي د ناټو قواوو يو وياند کريس هال وايي د دې لړۍ شپږم برتانوى عسکر د جون پر شپږمه په زابل ولايت کي د يوې څرخکي د رالوېدو له امله مړ سوئ، چي دا په شپږو ورځو کي د جون پر شپږمه نېټه شپږم برتانوى عسکر وو چي په افغان ماموريت کي ووژل سو.
د پوځي څرخکي د رالوېدو په دې پېښه کي دوه کاناډايي عسکر هم مړه سوي وو، چي طالبان وايي دوى په زابل ولايت کي راواچوله.
د برتانيې نور پنځه پوځيان د هلمند په ناارامه ولايت کي د بېلابېلو پېښو له امله وژل سوي، چي د دغه هيواد ٨٥٠٠ عسکر پکښي ځاى پر ځاى دي. په دې ولايت کي له تېري يوې اونۍ راهيسي امريکايي او افغان پوځيانو د طالبانو پر ضد عمليات هم پيل کړي چي تر اوسه پکښي روان دي.