لراوبر ویب پاڼه لراوبر يو افغان – تازه خبرونه
د آسوشېټډ پرس خبري آژانس خبر ورکړ چې د انډونيشيا پخوانۍ پوځي ډيکټاټور جنرال سوهارټو نن د يکشنبې په ورځ د جاګارټا په يوه روغتون کې د ۸۶ کالو په عمر مړ سو .
سوهارټو چې په کال ۱۹۶۷ کې د يوې خونړی کودتا په نتيجه کې د انډونيشيا باني سوکارنو د کاره ګوښه کړ تر ۱۹۹۸ پوري ددې هيواد پوځي ډيکټاټور وو . دده په دېرش کلنه پوځي واکمني کې د يو ميليون نه زيات وطنپاله انسانان چې د نوموړي د پوځي ډيکټاټورۍ سره مخالف وه ووژل سوه .
سو هارټو په کال ۱۹۹۸ کې ددې هيواد د ولسي پراخ پاڅون په نتيجه کې و استعفا ته مجبور کړی سو .
په انډونيشيا کې دډيکټاټور سوهارټو دېرش کلنه ظالمانه دوره پر بشري حقوقو باندي د خونړي تيري ، د عامه شتمنيو د غلا او اختلاس او د رشوت خوری په کارنامو سره مشهوره او په دې خاطر د پراخو ولسي او نړۍ وال انتقادو او غبرګونو سره مخامخ وو.
نړۍ واله نهادونه داسي براورد کوي چې د سوهارتو کورنۍ د اندونیشیا د پانګې څخه څه نا څه ۳۵ ميلیارډه ډالره وړي دي .
په پام کې وه چې جنرال سوهارتو په کال ۲۰۰۰ کې په اندونيشيا کې د پراخ اداري فساد او پر بشري حقوقوباندي د ناوړه تيريو په تور محاکمه شي خو ددې محکمې جريان تل د نوموړي د ناروغۍ په خاطر کال و بل ته ځنډېده .
