ښاغلی کبير خان د کرکټ بورډ د پريکړي له مخي استعفی کوي
د افغانستان د کريکټ بورډ وايي د ملي لوبډلې روزونکي کبير خان استعفى وړاندې کړې ده او دوى يې دغه غوښتنه منلې ده .
د کريکټ بورډ اداري مسوول ډاکټر حامد شينواري بي بي سي پښتو ويبپاڼې ته وويل د سکاتلند د سفر په ترڅ کې کبير خان د کريکټ بورډ مشر ډاکټر عمر زاخيلوال ته تيلې فوني ليکلى پيغام ليږلى و.”زۀ د افغانستان لوبډلې ته د کبير خان له امله راغلى يم که هغه نه وي زما شته والى د پوښتنې وړ دى” راشد لطيف
د ښاغلي شينواري په وينا په تيلي فوني پيغام کې کبير خان استعفى وړاندې کړې وه چې د کريکټ بورډ ومنله .
کبير خان بي بي سي پښتو ويبپاڼې سره په خبرو کې دا ومنله چې دۀ ښاغلي زاخيلوال ته تيلې فوني ليکلى پيغام ليکلى و خو دا يې ونه منل چې گواکې استعفى يې وړاندې کړې ده .خو کبير خان وايي که د کريکټ بورډ پريکړه دا وي چې دى په دغه دنده نه وي نو غاړه ورته ږدي .
د کريکټ بورډ اداري مسوول حامد شينواري د نوي روزونکي په باب وويل د اوس لپاره به راشد لطيف د ملي لوبډلې د روزونکي په توگه کار کوي .
د راشد لطيف دريځ : راشد لطيف له بي بي سي پښتو ويبپاڼې سره په خبرو کې د دۀ په وينا د کبير خان پر ليرې کيدو خواشيني وښوله .”کبير خان چې يو تکړه روزونکى دى په ډيرو سختو شرايطو کې زموږ لوبغاړي په ډېرې ښې طريقې وروزل او په نړېواله کچه يې وځلول”
د پاکستان دغه پخواني کپتان زياته کړه چې (( زۀ د افغانستان لوبډلې ته د کبير خان له امله راغلى يم که هغه نه وي زما شته والى د پوښتنې وړ دى )) .
راشد لطيف چې د پاکستان د ملي لوبډلې پخوانى کپتان دى په دې وروستيو کې د افغانستان د منډه جوړونکو د روزونکي په توگه په کار گمارل شوى و .
د کبير خان ريکارډ
کبير خان د ٢٠٠٨ کال په سپتمبر کې د افغانستان د روزونکي په توگه دنده پيل کړه . 
د دۀ په لارښونه افغانستان د کريکټ د نړيوالو اتلوليو د غوراوي څلورم او دريم پړاونه وگټل . ددۀ په شته والې کې افغانستان د نړيوالو رسمي يو ورځنيو لوبو دريځ هم خپل کړ .
د کبير خان په مرسته افغانستان د اسيا د کريکټ شورا غوره سيالۍ يا ايليټ کپ هم وگاټۀ. په څلور ورځنيو لوبو کې هم د کبير خان په شته والي کې افغانستان په ترسره کړيو پنځو لوبو کې څلور وگټلې او يوه يې له زمبابوې سره مساوي کړه . په رسمي يو ورځنيو نړيوالو سياليو کې د کبير خان په لارښونه افغانستان له خپلو ١٣ لوبو اووه وگټلې.
پدې اړه ريس احمدزى ، د ملي لوبډلې پخوانى کپتان ، له کابله :
ډير خپه شوم ځکه چې کبير خان د افغانستان د کريکټ لپاره ډير څه وکړل . دا به د ټيم لپاره ښه خبر نه وي . زۀ فکر نه کوم چې کبير خان دې استعفى ورکړې وي داسې پلان و چې د سکاتلند له سفره وروسته به د دۀ د ليرې کيدو لپاره کوشش کيږي . زۀ يقين لرم چې لوبډله به په دې پريکړه خوشاله نه وي .