لراوبر ویب پاڼه لراوبر يو افغان – تازه خبرونه
د پښتون ژغورني غورځنګ مشر منظور پښتين وايي، که د پوليسو افسر راو انور بېرته ونه نيول سي نو دوی به د کلکو احتجاجي پرېکړو پلان عملي کړي.
منظور پښتين وايي، د اګسټ تر ۱۲ نيټې چي د پښتون ژغورني غورځنګ غټه غونډه پکي دائريږي ترهغه مهاله که راو انور بېرته ونه نيول سو او پر خپله وظيفه پاتي سو نو په دې غونډه کي به د سختو احتجاجونو پرېکړه وکړي.
تمه ده د اګسټ پر ۱۲ په سوابۍ کي يوه ستره اولسي غونډه راوبلل سي او په دې غونډه کي به د هغه۶۰۰ پښتنو په ياد هم ويناوي وسي چي په ۱۹۴۸ کال کي د پاکستاني پوځ له خوا ووژل سوه.
منظور پښتين تېره شپه په يوه وينا کي چي پر فيسبوک خپره سوه وويل، د دوی د غورځنګ فعال غړی حيات پرېغل د تولنيزو رسنيو د فعاليت په تور بندي دی، خو د ۴۴۴ بې ګناه انسانانو قاتل راو انور خوشي سوی او ازاد ګرځي.
ښاغلی پښتين وايي، له ۱۹۴۸ کال راهيسي د پښتنو ټولوژنه روانه ده، په ۱۹۴۸ کال کي پاکستاني پوځ ۶۰۰ پښتانه ووژل او د وژنو دا لړۍ لا هم روانه ده.
منظور پښتين وايي، د نورو غوښتنو ترڅنګ به د پاکستاني حکومت څخه د خپلو سيمو د حقوقو غوښتنه هم کوي، ځکه د پاکستان حکومت د پښتنو د سيمو څخه معدني وسائل باسي او دوی له خپلو معدني زېرمو څخه بې برخي دي.
