کور / تازه خبرونه / ولسمشر اشرف غني: د طالبانو سره سولي ته ډېر ور نژدې سوي يو

ولسمشر اشرف غني: د طالبانو سره سولي ته ډېر ور نژدې سوي يو

دافغانستان ولسمشر اشرف غني طالبانو سره ډير زر د امن یو تړون ته د رسیدلو هیله ښکاره کړې ده اؤ ویلي یې دي اوس خبره د” مګر “څخه راوتلې اؤ په” کله؟ “ولاړه ده

ولسمشر اشرف غني وايي، ډېر ژر به د طالبانو سره د يو امن يو تړون ته ورسېږو. نوموړی وايي، اوس خبره له ؛” مګر “ څخه راوتلې او پر “ کله” ولاړه ده. په دې مانا چي اوس بحث پر دې روان دی چي د دواړو لوريو ترمنځ به يو د امن تړون کله کېږي.

ولسمشر غني چي د امريکا جان هوپکنز پوهنتون ته ئې  وېډيويي وينا کول وويل، تېره جون مياشت مي طالبانو ته پرته له کوم شرط څخه د مخامخ خبرو اترو وړانديز وکړ او دا مي ويلي وه چي په دې برخه کي د پاکستان لاسوهنه به د افغانستان جګړه څو لسيزي نوره هم اوږده کړي.

نوموړي په خپلو خبرو کي دا هم وويل چي د ۲۱ مي پېړۍ ډېري لږ جګړې به داسي وي چي پوځي حل دي ولري.

ښاغلی غني پر داسي مهال سولي ته د نږدې کېدو خبره کوي چي تېره ورځ د افغان سولي لپاره د امريکا استازي زلمي خليلزاد ويلي وه، چي د افغانانو په مشرۍ سولي ته ترټولو ډېر ورنږدې سوي دي.

په دې وروستيو کي افغان سولي ته هيلي زياتي سوي دي، چي يوه بېلګه ئې په مسکو کي د افغان سولي په تړاو غونډه وه، دا غونډه تېره جمعه وسول او د طالبانو استازو هم پکي ګډون کړی وو.

زلمی خليلزاد هم د سولي لپاره د هڅو په لړ کي د سيمي د هيوادونو په سفر راوتلی دی، نوموړی تېره ورځ په کابل کي د ګڼو افغان سياسي مشرانو سره ليدني کتني درلودې، چي وروسته به پاکستان، قطر، متحده عربي امارات او سعودي عربستان ته هم ولاړ سي.

همداراز پاکستان هم د طالبانو درې مهم مشران ملا عبدالغني برادر،عبدالصمد ثاني او صلاح الدین له بنده ازاد کړي دي.

ويل کېږي چي پاکستان د امريکا د فشار له مخي طالب زندانيان خوشي کړي دي، تر څو په افغانستان کي د طالبانو سره د سولي د مذاکراتو لپاره لاره هواره سي.

.